Azərbaycanlı azarkeşlərin qəlbi də, duaları da, arzuları da bu gün “Qarabağ”dan yanadı.

Hər kəs səbirsizliklə çempionun Zaqrebdən vətənə hansı nəticə ilə dönəcəyini gözləyir. Əlbəttə, biz Ağdam klubunun potensialını da, nəyə qadir olduğunu da bilirik. Bəs Xorvatiyada pley-off oyunu ilə bağlı düşüncələr necədi? Xorvatiyanın U-21 yığmasının üzvü, yerli “Opatiya”nın şərəfini qoruyan Nikola Makoliçlə bugünkü oyun barədə danışdıq.

- “Dinamo” Çempionlar Liqasının pley-offunda “Qarabağ”ı qəbul edəcək. Bu görüş barədə fikirlərin?
- “Qarabağ” hər il avrokuboklarda çıxış edən, yüksək keyfiyyətə malik klubdu. Bununla belə, “Dinamo” Xorvatiyanın ən uğurlu klubudu və uzun illərdi Avropada böyük klublara qarşı gözəl nəticələrlə oynayırlar. Bu iki qarşılaşma, heç şübhəsiz, maraqlı olacaq. İndidən qalibi proqnozlaşdırmaq çətindi.

- "Dinamo"nun üstünlüyü nədədi?
- “Dinamo”nun oyunçuları həqiqətən yüksək keyfiyyətə malikdi, çoxu öz milli komandalarında oynayır. Yaxşı hücuma sahibdilər və hardan hücum edəcəklərini heç vaxt bilmirsən. Bəlkə də hələ mövsümün əvvəli olduğuna görə “Dinamo” diqqətli davranmalıdı. Çünki komanda hələ forma yığır.

- Ümumiyyətlə, “Qarabağ”ın avrokubok oyunlarına baxmısız?
- Yox, amma komandanın bütün Avropaya səs saldığını bilirəm.

- “Qarabağ”ın sabiq futbolçusu Mahir Emreli “Dinamo”da çıxış edib. O, Xorvatiyada necə tanınırdı? Ümumiyyətlə, Xorvatiyada azərbaycanlılarla bağlı fikirlər necədi?
- Mahir Xorvatiyada həqiqətən də yaxşı çıxış etdi və çox hörmət qazandı. Xorvatlar Azərbaycan xalqı haqqında çox yaxşı düşünürlər ki, sizinkilər zəhmətkeşdi.

- “Qarabağ” ötən mövsüm Avropa Liqasında 1/8 finala yüksəlib. “Dinamo”nun “Qarabağ”ı keçmək şansını neçə faiz görürsən?
- Məncə, “Dinamo” bir az daha üstündü. Ona görə də şansları 60-ın 40-a nisbətində dəyərləndirirəm.

- Bu matçla bağlı hesab təxminlərin necədi?
- Bu dəfə Zaqrebdə oynayacaqlar, məncə, “Dinamo” qalib gələcək. Amma asan olmayacaq.

RÖYANƏ OĞUZ