"Qarabağ" Çempionlar Liqasının pley-offunun ilk matçında Zaqreb "Dinamo"sunun qonağı olacaq.

"Football-plus.az" xəbər verir ki, "Sabah"ın baş məşqçisi Krunoslav Renduliç bu barədə "vecernji.hr" saytına müsahibə verib. O, Xorvatiya təmsilçisinin "Qarabağ"la matçlara çox ciddi yanaşmasının vacib olduğunu vurğulayıb.

- "Dinamo" çox güclü komandadı. "Qarabağ"dan daha yaxşıdı. Amma şansları yarı-yarıya qiymətləndirirəm. Azərbaycan klubuna qarşı məsuliyyətli oynamalısız. Əks halda, sizin üçün yaxşı olmayacaq.

- "Dinamo"nun baş məşqçisi Sergey Yakiroviçlə komanda yoldaşı olmusuz. O, məlumat almaq məqsədilə sizə zəng edibmi?
- Hələ yox. Amma bu o demək deyil ki, əlaqə saxlamayacaq. Düzü, "Qarabağ"a çox vaxt ayırmıram. Ancaq qarşılaşacağımız turdan əvvəl analiz etməyə başlayıram. Kollektivin ən böyük keyfiyyəti Avropada topladığı zəngin təcrübədi. Onlar Azərbaycanın dominant komandasıdı. Hücumlarda son dərəcə güclüdü. Xüsusilə, Juninyo... İstənilən rəqibi sıradan çıxara bilər. "Bayer-04"ü qollarla "öldürdü". "Qarabağ"ın cəhənnəm yaşadan oyunçuları Juninyo, Benzya və Zubirdi. Bu komanda hörmətə layiqdi. Yenə deyirəm, "Dinamo" üçün çox çətin olacaq.

- Maksimirlilər çempionata üç qələbəylə başlayıb. Belə nəticə "Qarabağ"ı qorxudurmu?
- Düzdü, bu, vacib məqamdı. Lakin Azərbaycan klubu üç yox, altı oyun keçirib. Üstəlik, dördü Çempionlar Liqası matçıdı. "Qarabağ"ın heyətində yalnız qapıçılar dəyişib. Amma "Dinamo"da çoxlu yeni oyunçu var. Rəqibin ötən mövsümdəki standart kollektivə sahib olması ciddi üstünlükdü. Xorvatiyalılar bilsin ki, "Qarabağ" çempionat oyununu təxirə salıb və bütün fikrini "Dinamo"ya yönəldib. Mən "Osiyek"ə də xəbərdarlıq etmişdim ki, "Zirə"yə qarşı diqqətli olun. Onlarla zarafat etməyin. Nəticəni hamı gördü.

- Qurban Qurbanov uzun illərdi "Qarabağ"ı çalışdırır...
- Elədi ki, var. O, bütün səlahiyyətlərə malikdi. Oyunçuları özü seçir. Sanki "Qarabağ"ın sahibi odu. Heç kim işinə qarışmır.

- "Qarabağ"ın üstünlükləri nədən ibarətdi?
- Onların itirəcəyi heçnə yoxdu. Azərbaycanda bu komandanı hamı sevir. Təzyiq göstərmirlər. "Dinamo"dan tələblər isə daha böyükdü. Bu, ciddi təzyiqin olması deməkdi. Digər məsələ isə avrokuboklarda keçirdiyi ev oyunlarında minlərlə azarkeşin dəstəyidi.

- Bəs zəif cəhətləri?
- "Qarabağ" topa sahib olmağı xoşlayır və yalnız hücum edir. Belədə arxa xətdə boşluqlar yaranır. Bu, komanda üçün böyük riskdi. Nəticədə qollar buraxırlar. Amma heç kim arxayınlaşmasın. "Qarabağ" bu tərzlə "Ludoqorets"ə 7 qol vurdu.

KƏNAN BAHADIR