Luiş Nani özünə yeni klub tapıb. Portuqaliya millisinin sabiq oyunçusu karyerasını vətənində davam etdirəcək.

“Football-plus.az” xəbər verir ki, 37 yaşlı yarımmüdafiəçi Portuqaliya primeyrasında çıxış edən “Eştrela”ya keçib. Klubun mətbuat xidmətinin məlumatına görə, Nani ilə birillik müqavilə imzalanıb. Qeyd edək ki, onun sonuncu klubu “Adana Dəmirspor” olub. Luiş Türkiyə klubundan mövsümün sonunda ayrılmışdı.

Futbolçu karyerası ərzində “Sportinq”, “Mançester Yunayted”, “Fənərbaxça”, “Valensiya”, “Latsio” və “Orlando Siti”nin də formasını geyən Nani Portuqaliya yığmasında 112 oyuna 24 qol vurub.