Cüdo millimizin daha bir üzvü bu gün Paris-2024 Yay Olimpiya Oyunlarında mübarizəyə başlayır.

"Football-plus.az" xəbər verir ki, 100 kq çəki dərəcəsində yarışan Zelim Kotsoyev (Azərbaycan) 1/8 finalda Pyotr Kuçera (Polşa, dünya reytinqi 28) - Tomas Briçeno (Çili, dünya reytinqi 46) cütünün qalibi ilə qarşılaşacaq.

Zelim Kotsoyev hazırda öz çəkisində dünya reytinqində 1-cidir. Osetiyalı milliləşdirilmiş legioner olan Kotsoyev 2023-cü ildə Avropa çempionu, 2024-cü ilin mayında isə dünya çempionu olub. O, millimizin Yay Olimpiya Oyunlarında medal ümidlərindən sayılır.

Cüdo yarışları Bakı vaxtı ilə saat 12.00-da başlanacaq və bu gün də yekunlaşacaq. Kotsoyevin görüşü sıralamada 10-cudur.

Xatırladaq ki, Azərbaycan Paris-2024-ün cüdo yarışlarına 9 idmançı ilə qatılıb. Onlardan 7-si mübarizəni artıq başa vurub. Həmin idmançılardan yalnız Hidayət Heydərov medal (qızıl) qazanıb.