Uayt Trampı dəstəklədi və 50 min dollar ayırdı
ABŞ prezidentliyinə namizəd Donald Trampın Pensilvaniya ştatında seçkiönü mitinqdə çıxış edərkən sui-qəsd cəhdi ilə üzləşdiyini bilirsiz.
20 yaşlı Tomas Mettyu Kruksun açdığı atəş zamanı güllələr onun qulağını dəlsə də, həyatına təhlükə yaratmayıb. Tramp fəal seçkiönü kampaniyanı davam etdirir. Dünyanın bir çox nüfuzlu siyasi xadimləri məlum sui-qəsd cəhdinə biganə qalmayıb. Sabiq prezidentlə dostluq münasibətləri saxlayan UFC rəhbəri Dana Uayt da bu mövzuda danışıb:
“Həmişə bu adama heyranlıq duymuşam. Tramp həyatım boyunca rastlaşdığım ən güclü və mətanətli adamlardan biridi. Sizə nə demək istəyirəm? Bax, hər kəs möhkəm görünmək istəyir, eləmi? Ancaq iş gəlib ciddi sınaqlara çatanda kimin nəyə qadir olduğu görünür. Bu adam çox möhkəm kişidi, beləsinə hələm-hələm rast gəlməzsən. Güllə yarası alır, yıxılır, qalxır və kütləyə deyir ki, mübarizə aparmalıyıq! Sadəcə, şoka düşdüm. Həyatımda heç vaxt belə adam görməmişəm. O həqiqətən bütün zamanların ən güclü və cəsur adamlarından biridi. Xoşunuza gəlmirsə, onun haqqında istədiyinizi deyə bilərsiz. Ancaq snayper onu öldürmək istədi, bir neçə millimetr səhvə yol verdi, güllə Trampın qulağına dəydi. Bu adamın demək olar ki, 80 yaşı var, az qala həyatdan olacaqdı. Hətta bundan sonra da ayağa qalxa bildi. Bu adam 25 ildi dostumdu, qeyri-adi dost və nə vaxtsa qarşılaşdığım ən böyük adamlardan biridi. Həmişə Amerikanın qəhrəmanı kimi qalacaq”.
Dəfələrlə Amerikanın sabiq prezidentinə dəstəyini göstərən, hətta seçkiönü mitinqlərində də çıxış edən Uayt son sui-qəsd cəhdi zamanı zərər çəkənlərin ailələrinə və yaxınlarına 50 min dollarlıq ianə ayırıb.
Xatırladaq ki, hadisə zamanı atəş açan şəxs öldürülüb, mitinq iştirakçılarından biri ölüb, ikisi isə çətin vəziyyətdə xəstəxanaya çatdırılıb.
