“Elə bil komandalarımızın əvvəlki xəstəliyi əcnəbi futbolçulara keçib. Bu oyunda lazım olmayan, yersiz hərəkət, komandanı düşünmədən edilən davranış gördüm. Oyunun əvvəlində təmsilçimiz üstün idi. Matçın gedişində də hiss olundu ki, "Zirə" "Şerif"i keçməyə qadir olan bir komandadı. Təəssüf ki, alınmadı. Hakimlər qazaxıstanlı həmkarlarımız idi. Oyunun əvvəlində həyəcan var idi ki, bu da onların gənc, təcrübəsiz olmasıyla bağlıdı. Bu da ilk 10-15 dəqiqədə müşahidə olundu.  Amma oyunun axarında heç bir kobudluq olmadı. Ümumilikdə hakimlikdə ciddi nöqsan görmədim. Matç öz axarıyla gedirdi, komandalar bir-birinə qarşı elə də aqressiv deyildi. Kobudluq olmadı. Təəssüf ki, birinci hissənin sonlarında yersiz qayda pozuntusu “qartallar”ı çətin vəziyyətə saldı. Keçilə biləcək rəqibi dəf edə bilmədik.

Bundan sonra komandalar özü bu mövzunu ətraflı fikirləşməlidi. Bu sahəyə peşəkarlar cəlb olunmalı, diqqət ayrılmalıdı. Futbolçuların psixoloji durumu ilə ciddi şəkildə işləmək lazımdı. Bir komanda öndə olduğu halda ciddi səhv edir. Ekrandan da əl hərəkəti göründü. Hakimin tutduğu mövqe daha dəqiq olduğuna görə qərarı qəti oldu, heç VAR da müdaxilə etmədi. Adama təsir edən də budu. Hər şey bizim xeyrimizə getdiyi halda, buna nə ehtiyac var idi? Nəticə etibarilə hakimlik oyunun axarına çox təsir etmədi. Əvvəllər də belə səhvlər üzündən komandalarımız mərhələ keçə bilmirdi. Bu dəfə də eyni formada oldu. Gələcək oyunlarda  Rəşad Sadıqov və avrokubok iştirakçısı olan digər baş məşqçilər birbaşa futbolçularla söhbət aparmalı, onların psixoloji durumu ilə maraqlanmalıdı. Oyun qaydaları onların nəzərinə çatdırmalıdı.

Bu “qırmızı” ilə barışmaq lazımdı. Amma hakimliyə kölgə salmaq olmaz. Oyun sakit başladı, komandalar bir-birinə münasibətdə adekvat idi, düzgün futbol oynayırdılar. Hansısa kobudluq görmədim, bir yer istisna olmaqla. Top uğrunda sərt mübarizəyə meyillilik var idi. Rəşad Sadıqov bunlarla barışmalıdı. Həmin epizoda baxıb, müəyyən mütəxəssislərin köməyi ilə söhbət aparmalıdı. Bu, artıq bütün komandalar üçün bir siqnaldı”.