“Mən yox, Türkiyə futbolu qalib gəldi” - 44-cü prezident
İyulun 18-də Türkiyə Futbol Federasiyasında növbədənkənar prezident seçkisi keçirildi.
Xatırladaq ki, budəfəki seçkidə əvvəlcə 4 namizəd olsa da, sonradan onların sayı ikiyə endi. Çünki İsmayıl Uyanık və Sərvət Yardımcı sürpriz şəkildə seçkiyə bir həftə qalmış namizədliyini geri götürdü. Xüsusilə də uzun illər UEFA-nın İcraiyyə Komitəsinin üzvü olan Yardımcının geri çəkilməsində ölkə prezidenti Rəcəp Tayyib Ərdoğanın “barmağı olduğu” iddia edildi. Belədə ortada iki namizəd – Mehmet Büyükekşi ilə İbrahim Hacıosmanoğlu qaldı.
"Football-plus.az"ın məlumatına görə, son hadisələrin ardından Büyükekşinin favorit sayıldığı seçkidə qalib gələcəyi və vəzifəsini qoruyacağı güman olunurdu. Amma Hacıosmanoğlu bütün proqnozları alt-üst etdi. Ankarada yerləşən “Mariott Otel”də baş tutan seçkidə Hacıosmanoğlu 134, Büyükekşi sə 129 səs topladı. Yəni favorit sayılan Büyükekşi rəqibinə cəmi 5 səslik fərqlə məğlub oldu.
Beləliklə, 58 yaşlı Hacıosmanoğlu TFF-nin 44-cü prezidenti seçildi. Qeyd edək ki, Büyükekşi bu vəzifəyə 2022-ci ildə gəlmişdi. Əslində Türkiyəyə Çempionlar Liqasının finalını, eləcə də AÇ-2032-nin final mərhələsini bəxş edən, üstəlik “ay-ulduzlular”ın AÇ-2024-dəki uğurlu çıxışı ilə əli-qolu güclənən Büyükekşi işinin öhdəsindən heç də pis gəlmirdi. Amma o, Türkiyə futbolunun qanayan yarası – hakimlik problemini heç cür yoluna qoya bilmədi. Üstəlik ötən ilin sonunda Səudiyyə Ərəbistanında “Fənərbaxça” ilə “Qalatasaray” arasında keçirilməli olan superkubok matçının Atatürk qalmaqalı üzündən baş tutmaması da Büyükekşinin nüfuzuna ciddi zərbə vurdu.
Qeyri-rəsmi mənbələrə inansaq, bu seçkidə nəhənglərin heç biri Büyükekşini dəstəkləmədi. “Fənərbaxça” preizdenti Əli Koç, ümumiyyətlə, onunla sanki düşmən idi. Hacıosmanoğlu bütün bunlardan xəbərdar idi və ilk gündən düzgün strategiya qurmağa başladı. O, “Trabzonspor”, “Sivasspor”, “Adana Dəmirspor” başda olmaqla bir sıra superliqa klublarının, eləcə də 2-ci və 3-cü liqa təmsilçilərinin dəstəyini qazandı. Bu işdə özünə ən yaxın köməkçi kimi uzun illər “Sivasspor”un prezidenti olmuş Məcnun Odyakmazı seçdi. Seçki kampaniyasını yaxşı təşkil edən və Türkiyə futbolunda ilk növbədə ədaləti bərpa etməyə çalşacağına söz verən Hacıosmanoğlu sonda istəyinə çatdı. Artıq “Sivasspor”un prezidenti vəzifəsindən uzaqlaşan Odyakmaz bundan sonra TFF-də vitse-prezident kimi çalışacaq. Ondan başqa Hacıosmanoğlunun idarə heyətində bu isimlər yer alır:
Bayram Saral, Zəhra Nəşə Kavak, Lalə Cender, Fuat Gökdaş, Cengiz Gökay, Zafer Saraç, Mevlut Aktan, Bayram Akgül, Hasan Surözü, Ceyhun Kazancı, Mustafa Təməl Bozbağ, Ural Aküzüm, Bilal Aslan.
Qısaca qeyd edək ki, İbrahim Hacıosmanoğlu 1966-cı ildə 12 uşaqlı ailənin 11-ci övladı kimi Trabzonda dünyaya göz açıb. Müxtəlif dönəmlərdə ticarət və inşaat sektorunda çalışıb. 2005-07-ci illərdə “Trabzonspor”da yönətici olub. 2013-cü ildə isə “Trabzonspor”dakı seçkidə qalib gələrək klub tarixinin 15-ci başqanı olub. 2015-ə qədər bu vəzifəni icra edib.
Hacıosmanoğlu prezident seçiləndən sonra bunları deyib:
“Bizə bu etimadı göstərənlərin ümidlərini boşa çıxarmamağa çalışacağıq. Öncə qardaşlığı təbliğ eədəcəyik. Bizə qarşı bir addım atana biz on addım atacağıq. Məsələni ”oldu, bitdi” səviyyəsinə gətirməyəcəyik. Həvəskar klublardan tutmuş superliqa klublarının təmsilçilərinə qədər hər kəslə üzbəüz oturub problemləri müzakirə edəcəyik. Futbolun problemlərini futbolun içində olan şəxslərlə bilrikdə çözəcəyik. Yükümüz ağır, məsuliyyətimiz böyükdü. Amma prinsiplərimiz bəllidi. Tam ədalətli şəkildə futbolumuzu idarə edəcəyik. Məcnun Odyakmazla bu yola başlayarkən belə desək, üzərimizdəki formaları çıxardıq. Çünki artıq hər kəsə qarşı eyni məsafədə olmağa məcburuq. Türkiyə futbolu son dönəmlərdə əsl xaos yaşayır. Bu seçkidə mən qalib gəlmədim, Türkiyə futbolu qalib gəldi. İlk növbədə hörmətli prezidentimizə təşəkkürümü bildirirəm.
Belə şayiələr dolaşırdı ki, guya namizədlər prezidentin təzyiqindən sonra geri çəkilir. Mən prezidentimizlə dost olmağın şərəfini yaşayıram. Müdaxilə etsəydi, mənə də irad bildirərdi. Ancaq onun adından istifadə edənləri bu gün futbolumuzdan kənarlaşdırdıq. Son günlərdə çox çalışdıq və çox yorulduq. Amma bu yorğunluq, inşallah, Türkiyə futbolunu gözəl sabahlara daşımağa yardım edəcək. Burdan federasiyanın müxtəlif komitələrində yer alan üzvlərinə səslənirəm. Əlbəttə, at sahibinə görə kişnəyir. Amma istefa vermək və yeni rəhbərliyin önünü açmaq onlar üçün etik cəhətdən ən doğru hərəkət olardı. Onlardan tələbim odu ki, sabahdan etibarən hamısı bir-bir istefa versin”.
Belə şayiələr dolaşırdı ki, guya namizədlər prezidentin təzyiqindən sonra geri çəkilir. Mən prezidentimizlə dost olmağın şərəfini yaşayıram. Müdaxilə etsəydi, mənə də irad bildirərdi. Ancaq onun adından istifadə edənləri bu gün futbolumuzdan kənarlaşdırdıq. Son günlərdə çox çalışdıq və çox yorulduq. Amma bu yorğunluq, inşallah, Türkiyə futbolunu gözəl sabahlara daşımağa yardım edəcək. Burdan federasiyanın müxtəlif komitələrində yer alan üzvlərinə səslənirəm. Əlbəttə, at sahibinə görə kişnəyir. Amma istefa vermək və yeni rəhbərliyin önünü açmaq onlar üçün etik cəhətdən ən doğru hərəkət olardı. Onlardan tələbim odu ki, sabahdan etibarən hamısı bir-bir istefa versin”.
Digər xəbərlər
