Futbol bayramı davam edir. Bu gün keçiriləcək iki qarşılaşma ilə 1/8 final mərhələsinə yekun vurulacaq. Tədricən həyəcan artır, oyunların sayı isə azalmağa doğru gedir.

1/8 final
2 iyul
Rumıniya – Niderland 0:3
Codi Qakpo, 20. Donyel Malen, 83; 90+3.
Hakim: Feliks Svayer (Almaniya)
Cəzalı: Banku/yoxdu
Stadion: “Allyants Arena” (Münhen)
Əvvəlki oyunlarının balansı: +1=3-10

Təbii ki, bu cütdə Niderland favorit hesab olunur. Amma “narıncılar” hələ ki ideal təsir bağışlamır. Polşanı çətinliklə məğlub edən, Mbappesiz Fransadan bir xal alan, Avstriyaya isə sürpriz şəkildə məğlub olan Ronald Kumanın komandası rumınlarla görüşdə həm növbəti mərhələyə adlamağa, həm də inamlı qələbə ilə nüfuzunu yaxşılaşdırmağa çalışacaq. Ukrayna üzərində qazanılan 3:0-lıq tarixi qələbə sayəsində heç də asan olmayan qrupu zirvədə tamamlayan və AÇ-2000-dən bəri ilk dəfə pley-offa yüksələn rumınlar üçün bu turniri artıq indidən uğurlu saymaq olar. Amma necə deyərlər, iştah diş altındadı. Özü də nəzərə alaq ki, “zambaqlar ölkəsi” AÇ-lərdə sanki pley-off sindromu yaşayır. Zarafat deyil, komanda AÇ-nin pley-offunda son qələbəsini 20 il öncə qazanıb! Özü də o vaxt niderlandlılar 1/4 finalda İsveçi yalnız penalti seriyasında üstələmişdilər. Həmin turnirdən sonra Niderland yalnız iki dəfə qrup mərhələsi səddini dəf edib. Komanda 2008-də qrupdan çıxan kimi Rusiyaya, 2021-də isə Çexiyaya boyun əydi. 2012-də Niderland qrup mərhələsini dəf edə bilməmişdisə, 2016-da, ümumiyyətlə, final mərhələsindən kənar qalmışdı. Şəxsi oyunlarda Niderlandın böyük üstünlüyü var. Rumıniya tarixi ərzində güclü rəqibə qarşı keçirdiyi 14 oyunun yalnız birində qalib gəlib. Bu qələbə 2007-nin oktyabrında qeydə alınıb. O vaxt Farul şəhərində AÇ-2008-in seçmə mərhələsində keçirilən matçda Rumıniya fanatları önündə minimal hesabla üstün olmuşdu. Komandaların son oyunu 2017-ci ildə baş tutub. Həmin vaxt Buxarestdə keçirilən yoldaşlıq matçında Niderland 3 cavabsız qolla üstün olmuşdu.

Avstriya – Türkiyə 1:2
Mixail Qriqoriç, 67 - Merih Demiral, 1; 59.
Hakim: Artur Diaş (Portuqaliya)
Cəzalı: Vimmer/Hakan Çalxanoğlu, Samet Akaydın
Stadion: “Red Bull Arena” (Leyptsiq)
Əvvəlki oyunlarının balansı: +9=1-7

Bu gün türk dünyasının qəlbi Leyptsiqdə döyünəcək. Türkiyənin 1/4 finala yolu məhz bu şəhərdən keçir. Rəqib çoxlarının fikrincə, bu turnirin ən baxımlı futbol sərgiləyən komandalarından olan Avstriya yığmasıdı. Təbii ki, Fransa və Niderlandın yer aldığı qrupu zirvədə tamamlayan bir komandanın gücünə şübhə etmək düzgün olmaz. Avstriya həm futbolsevərlər, həm də bukmekerlər tərəfindən bu cütün favoriti sayılır. Amma gəlin etiraf edək ki, avstriyalılar top-yığmalardan hesab olunmur. Hər halda, Fransa qrup liderliyini öz əli ilə Avstriyaya verdi. Əks təqdirdə Türkiyə bu gün fransızlarla qarşılaşacaqdı. Məsələyə sırf bu prizmadan yanaşsaq, əslində Türkiyənin bəxti gətirib. “Ay-ulduzlular”da zədəli futbolçu yoxdu. Düzdü, ötən oyunu cəza üzündən buraxan Əbdülkərim Bardakcı bu dəfə Vinçentso Montellanın ixtiyarında olacaq. Amma əvəzində digər mərkəz müdafiəçisi Samet Akaydın cəzalı duruma düşüb. Bu oyunda müdafiənin mərkəzində Merih Dəmiral ilə Əbdülkərimin qərarlaşacağı gözlənilir. Türklərin heyətində ən ciddi itki, heç şübhəsiz, Hakan Çalxanoğludu. Çexiya üzərində qələbənin əsasını qoyan kapitan cəza üzündən bu vacib oyunda komandasına yardım edə bilməyəcək. Hakanın yoxluğunda yarımmüdafiənin mərkəzində Kaan Ayhan, İsmayil Yüksək və Orkun Kökçü kimi isimlərə ikiqat iş düşəcək. Türkiyə bir neçə ay öncə gözlənilmədən Avstriya önündə böyük fiasko yaşamışdı. Martda Vyanada keçirilən hazırlıq oyununda türklər 1:6 hesabı ilə pərən-pərən düşmüşdülər. Sözsüz, həmin nəticə də qarşıdakı oyunun prinsipiallığını artırır. Çünki Türkiyə meydana təkcə 1/4 finala vəsiqə yox, həm də qisas arzusu ilə çıxacaq. Bu məqamı futbolçular da oyunöncəsi açıqlamalarda vurğulayıb. Avstriya hər nə qədər şəxsi oyunlarda üstün olsa da, bu qələbələrdən çoxu uzaq tarixdə əldə olunub. Məsələn, komandalar arasında 1948-88-ci illər aralığında keçirilən ilk 8 oyundan 7-də avstriyalılar sevinib. Amma 1988-dən bəri baş tutan 8 oyunda qələbə sayında Türkiyə öndədi (5:2). UEFA-nın bu matça təyin etdiyi hakim Türkiyə üçün heç də düşərli deyil. Belə ki, indiyə qədər həm yığma, həm də klub futbolu çərçivəsində Türkiyə təmsilçiləri Artur Diaşın idarə etdiyi 6 qarşılaşmanın hamısında (!) məğlub olub. Ümid edək ki, qardaş ölkənin yığması bu uğursuz seriyaya son qoymağı bacaracaq.