AÇ-2024-də qrup mərhələsini geridə qoymuşuq.

Bu gün turnirin ən maraqlı hissəsinə - pley-offa start verilir. Artıq heç kimin səhv etmək haqqı yoxdu. Çünki uduzan tərəf turniri tərk edəcək. Pley-off duellərinə nəzər salmağın tam zamanıdı.

29 iyun
İsveçrə - İtaliya 2:0
Remo Freyler, 37. Ruben Varqas, 46.
Hakim: Şimon Marçinyak (Polşa)
Cəzalı: Vidmer/Kalafyori
Stadion: “Olimpiaştadion” (Berlin)
Əvvəlki oyunlarının balansı: +8=24-29

Ötən Avropa çempionatının 1/8 finalında Fransanı mübarizədən kənarlaşdıran İsveçrə bu dəfə futbol dünyasına daha bir sürpriz yaşatmaq niyyətindədi. Hərçənd hamı bilir ki, İtaliya AÇ-nin son qalibi statusunda olmasına baxmayaraq, əvvəlki illərdəki qədər əzəmətli görünmür. Ona görə də italyanların isveçrəlilərə uduzması (məsələn, ispanların gürcülərə udzmasından fərqli) dünyanın 8-ci möcüzəsi sayılmayacaq. Meydan sahibi Almaniya ilə oyunda qələbəni son saniyələrdə əldən verən Murat Yakının komandası istənilən rəqiblə başabaş oynamağa qadir olduğunu göstərdi. Diqqəti cəlb edən ən önəmli məqam İtaliyanın bu rəqibə son 31 ildə uduzmamasıdı! Belə ki, İsveçrə İtaliyanı sonuncu dəfə 1993-ün mayında – DÇ-1994-ün təsnifat mərhələsində məğlub edib. Həmin vaxt Roy Hocsonun çalışdırdığı isveçrəlilər evdə minimal hesabla üstün olmuşdular. Amma digər tərəfdən, İtaliyanın üstünlüyünü “qorxunc” adlandırmağa adamın dili gəlmir. Çünki bu komandalar arasındakı son 6 duelin 5-də bərabərlik qeydə alınıb. “Skuadra adzurra” bu müddətdə yeganə qələbəsini ötən qitə turnirində doğma fanatları önündə əldə edib (3:0).

Almaniya – Danimarka 2:0
Kay Havertz, 53-pen. Camal Musiala, 68.
Hakim: Maykl Oliver (İngiltərə)
Cəzalı: Ta/Yulmann
Stadion: “Siqnal İduna Park” (Dortmund)
Əvvəlki oyunlarının balansı: +15=5-8

Hələ ki turnirin ən məhsuldar komandası olan Almaniya döyüşkən Danimarkanı sınağa çəkəcək. Skandinaviyalılar o qədər də asan olmayan qrupda üç bərabərlik sayəsində 2-ci pilləni tutaraq pley-offa yüksəldilər. Danimarkanın müdafiə xətti təkcə bu turnirdə yox, ümumiyyətlə, son dönəmlərdə etibarlı təsir bağışlayır. Komanda keçirdiyi son 15 qarşılaşmanın yalnız birində 1-dən artıq top buraxıb! Bu baxımdan qrupda 3 oyuna 8 qol vuran almanlarla duel Kasper Yulmannın komandasının əsl gücünü ortaya qoyacaq. Bundestim qalib gələcəyi təqdirdə son 5 AÇ-də 4-cü dəfə 1/4 finala yüksələcək. Digər tərəfdən komanda iştirak etdiyi son 3 nəhəng turnirin heç birində ən güclü “8-lik” sırasına yüksələ bilməyib. Sözsüz, dünya futbolunun ən titullu komandalarından olan Almaniya bu uğursuz seriyaya son qoymaq üçün əlindən gələni edəcək. Danimarka tarixində ilk dəfə ardıcıl iki AÇ-də pley-offa yüksəlib və bu uğurla kifayətlənmək istəmir. Bu komandalar arasındakı son 4 oyunun 3-də bərabərliyin qeydə alınması onu göstərir ki, bizi yenə gərgin mübarizə gözləyir. Bu müddətdə bərabərliyin qeydə alınmadığı yeganə oyun AÇ-2012-nin qrup mərhələsinə təsadüf edib. Həmin vaxt almanlar 2:1 üstün olmuşdular. İndiki heyətdən Kroos, Müller və Noyer həmin oyunda da meydanda idi.