Bu gün UEFA Çempionlar Liqasında yarımfinal mərhələsinin ilk oyunlarına yekun vurulub.

"Football-plus.az" xəbər verir ki, İtaliya futbolu, nəhayət, qayıtmağı bacardı. Düzdü, kimlərsə, iddia edə bilər ki, Milan nəhənglərinin yarımfinala çıxması, sadəcə, bəxtin və uğurlu püşkün nəticəsidi. Həm də ilk baxışdan belə görünə bilər ki, bu mövsüm ÇL-in qalibi istənilən halda digər cütdə yer alan klublardan biri olacaq. Amma bunlar artıq başqa söhbətin mövzusudu.

Bu mövsüm 3 fərqli turnirin yarımfinalında İtaliyanın 5 klubu çıxış edir. Bu boyda təsadüf ola bilməz. İki barışmaz rəqibin ÇL-dəki duelinə gəlincə, istər-istəməz bu komandaların 2000-ci illərin əvvəllərindəki rəqabəti yada düşür. “İnter” fanatları, yəqin ki, həmin matçları və Andrey Şevçenkonun qollarını xatırlamağı xoşlamır. Çünki həm 2002/03-ün yarımfinalında, həm də 2004/05-in 1/4 finalında “Milan” “İnter”i mübarizədən kənarlaşdırmış və məhz əfsanəvi Şevçenkonun qolları həlledici olmuşdu.

Digər tərəfdən “İnter” ÇL-i qazanan son İtaliya klubu olması ilə öyünə bilər. “Milan” 20 il əvvəlki qədər əzəmətli görünmür. Elə indiki heyətdə Şevçenko səviyyəsində forvard da yoxdu. Ona görə də “İnter”in yeni tarix yazmaq və qisas almaq üçün gözəl fürsəti var. Komandaları indiki durumuna görə tərəzinin gözünə qoysaq, “İnter” sanki daha ağır gələr. Simone İnzaqinin kollektivi son 5 rəsmi oyunun hamısında qalib gəlib.

Üstəlik ölkə kubokunun yarımfinalında da “Yuventus”u mübarizədən kənarlaşdırıb. “Milan” isə bu dərəcədə yaxşı formada deyil. “Rossonyerlər” son 9 rəsmi oyundan 4 qələbə, 5 heç-heçə ilə ayrılıblar. Təsadüfi deyil ki, bukmekerlər də bu matçda “neradzurra”nı favorit sayır. Amma digər tərəfdən yalnız bu mülahizəyə əsasən “İnter”in mərhələ adlayacağını söyləmək düzgün deyil. Çünki ilk baxışdan “Milan” 1/4 finalda “Napoli” ilə dueldə də favorit sayılmırdı. Belə oyunlarda komandaların hansı formada olması ilə yanaşı, təcrübə və psixoloji amillər də böyük rol oynayır. Ona görə də gəlin tələsməyək.

Viktor Osimhenin 1/4 finalın cavab matçının son saniyələrində vurduğu bərabərlik qolu “Milan”ın ÇL-dəki “quru” seriyasının 596-cı dəqiqədə qırılmasına səbəb oldu. Ümumiyyətlə, iş ÇL-in pley-off mərhələsinə çatanda “Milan” həmişə müdafiəsi ilə ön plana çıxır. Komanda bu turnirin pley-offunda son 6 ev oyunda 1 qol buraxıb və 1 dəfə uduzub (4 qələbə). Bundan başqa, “Milan”ın avrokuboklarda İtaliya təmsilçilərinə qarşı keçirdiyi 11 matçın yalnız 1-də uduzması diqqəti çəkir (5 qələbə). Yeganə məğlubiyyət 1993-də Avropa Superkubokunun finalında “Parma” ilə dueldə qeydə alınıb. Həmin vaxt “rossonyerlər” səfərdə minimal hesabla üstün olsalar da, evdə 2 cavabsız qolla uduzmuşdular. Bu, eyni zamanda “Milan”ın avrokubokların pley-offunda öz həmyerlilərinə qarşı 5 dueldən qalib ayrıla bilmədiyi yeganə haldı. “İnter”in isə Avropa arenasında öz həmyerlilərinə qarşı keçirdiyi 11 oyunda 4 qələbəsi və eyni sayda məğlubiyyəti var.

10 may
Milan – İnter 0:2
Edin Ceko, 8, Henrik Mxtryan, 11
Hakim: Xesus Xil Mansano (İspaniya)
Cəzalı: yoxdu
Avrokuboklardakı oyunlarının balansı: +2=2-0
Milan. "San Siro" stadionu. 23.00