Mayın 14-16-sı aralığında Libertadores Kubokunun (LK) qrup mərhələsinin 5-ci turunun oyunları keçirildi.

“Football-plus.az” xəbər verir ki, artıq Cənubi Amerikanın ən nüfuzlu klub turnirinin 1/8 finalının 11 iştirakçısı məlumdu.

4-cü turdan sonra qruplarda 6 komanda pley-offa erkən vəsiqə qazana bilmişdi. B qrupunda “Talyeres de Kordoba” və “San Paulu”, E qrupunda “Bolivar”, F qrupunda “Palmeyras”, G qrupunda “Atletiko Mineyro” və H qrupunda “River Pleyt” sonuncu turun nəticələrindən asılı olmayaraq, ən güclü 16 iştirakçı sırasında yerini təmin etmişdilər. 5-ci turdan sonra u klubların sırasına daha 5 iddiaçı qoşuldu.

Nəhayət, turnirin son qalibi də azarkeşlərini erkən sevindirə bildi. Yeni mövsümdə statusunu bir qədər çətinliklə qoruyan “Fluminense” evdə “Serro Portenyo”ya 2:1 hesabı ilə qalib gəlməklə ilkin hədəfini reallaşdırdı. A qrupunda yarışan Fernando Dinizin komandası xalını 11-ə çatdırmaqla liderliyi də təmin etdi. Bu qrupdan ikinci vəsiqəyə qalan üç komanda iddia edir.

Hesabat turunda C qrupunda “Stronqest” 1/8 finala vəsiqəni təmin etdi. Boliviya klubu evdə “Uaçipato”nun qapısından 4 cavabsız top keçirərək pley-offa çıxdı. Qeyd edək ki, bu qrupda “Qremio”nun iştirakı ilə nəzərdə tutulan iki oyun Braziliyadakı daşqın və sel fəlakəti səbəbindən təxirə salınıb.

Artıq D qrupunda mübarizəni bitmiş hesab etmək olar. Hesabat turunda uyğun olaraq “LDU Kito” və “Universitario”nu səfərdə minimal hesabla məğlub edən “Xunior” ilə “Botafoqo” pley-offda yerini təmin etdilər. Kolumbiya və Braziliya komandaları sonuncu turda 1-ci yeri tutmağa çalışacaqlar. Vacib oyun Kolumbiyada keçiriləcəyi üçün “Xunior”un şansı daha yüksək qiymətləndirilə bilər.

Nəhayət, H qrupunda “River Pleyt”dən sonra “Nasyonal” da azarkeşlərini sevindirdi. “Deportivo Taçira”ya Venesuelada minimal hesabla qalib gələn Uruqvay klubu azı 2-ci yeri özünə təmin etdi. “Nasyonal” sonuncu tura qrupu lider kimi başa vurmaq hədəfi ilə baxacaq. Beləliklə, pley-offa ayrılan son 5 vəsiqənin sahibi 6-cı turun oyunlarından sonra məlum olacaq.
Sonda bir faktı da qeyd edək. G qrupunda qələbələri sıralayan “Atletiko Mineyro”nun seriyası qırıldı. Braziliya təmsilçisi bu dəfə “Penyarol”a Uruqvayda 0:2 hesabıyla uduzdu. Bununla da qrup mərhələsində xal itirməyən komanda qalmadı.

qrup mərhələsi, 5-ci tur
A qrupu
Fluminense (Braziliya) - Serro Portenyo (Paraqvay) 2:1
Marselo, 14. Qanso, 74 – Viera, 19.
Alyansa Lima (Peru) - Kolo Kolo (Çili) 1:1
Barkos, 42 – Vidal, 78.

1. Fluminense 5 3 2 0 6-3 11
2. Kolo Kolo 5 1 2 2 3-4 5
3. Serro Portenyo 5 1 2 2 3-4 5
4. Alyansa Lima 5 0 4 1 3-4 4

B qrupu
Talyeres de Kordoba (Argentina) - Kobresal (Çili) 1:0
Xirotti, 82.
San Paulu (Braziliya) - Barselona (Ekvador) 0:0

1. Talyeres de Kordoba 5 4 1 0 10-4 13
2. San Paulu 5 3 1 1 8-3 10
3. Barselona 5 0 3 2 4-8 3
4. Kobresal 5 0 1 4 2-9 1

C qrupu
Stronqest (Boliviya) - Uaçipato (Çili) 4:0
Ramalyo, 34. Orteqa, 61. Kiroqa, 71. Anqulo, 90+1-p.
“Qremio” (Braziliya) – “Estudiantes (Argentina) oyunu iyunun 9-na təxirə salınıb.

1. Stronqest 5 3 1 1 8-2 10
2. Uaçipato 4 1 2 1 3-5 5
3. Estudiantes 4 1 1 2 3-4 4
4. Qremio 3 1 0 2 1-4 3

D qrupu
LDU Kito (Ekvador) – Xunior (Kolumbiya) 0:1
Enamorado, 37.
Universitario (Peru) - Botafoqo (Rio de Janeyro, Braziliya) 0:1
Ceffinyo, 77.

1. Xunior 5 2 3 0 7-4 9
2. Botafoqo RJ 5 3 0 2 7-6 9
3. Universitario 5 1 2 2 5-7 5
4. LDU Kito 5 1 1 3 4-6 4

E qrupu
Flamenqo (Braziliya) – Bolivar (Boliviya) 4:0
Jerson, 1. Ayrton Lukas, 38. Everton, 43. Pedro, 56.
Milyonarios (Kolumbiya) - Palestino (Çili) 1:1
Karvaxal, 40 – Marabel, 90+2.

1. Bolivar 5 3 1 1 10-8 10
2. Flamenqo 5 2 1 2 8-4 7
3. Palestino 5 2 1 2 5-8 7
4. Milyonarios 5 0 3 2 6-9 3

F qrupu

Palmeyras (Braziliya) - İndependyente del Valye (Ekvador) 2:1
Rios,36. Q.Qomes, 45+3-p. – L.Dias, 64.
San Lorenso (Argentina) - Liverpul (Uruqvay) 3:2
Egisamon, 5. Kuelyo, 45+5. Kampi, 87 – D.Qarsiya, 24. L.Rodriges, 62.

1. Palmeyras 5 4 1 0 14-5 13
2. San Lorenso 5 2 1 2 6-6 7
3. İndependyente del Valye 5 1 1 3 6-8 4
4. Liverpul 5 1 1 3 5-12 4

G qrupu
Penyarol (Uruqvay) - Atletiko Mineyro (Braziliya) 2:0
L.Ernandes, 70. Silvera, 76.
Rosario Sentral (Argentina) - Karakas (Venesuela) 4:1
Lovera, 29. Modika, 33; 57. Lo Çelso, 90+1 – Eçenike, 85.

1. Atletiko Mineyro 5 4 0 1 10-6 12
2. Penyarol 5 3 0 2 10-4 9
3. Rosario Sentral 5 2 1 2 7-5 7
4. Karakas 5 0 1 4 3-15 1

H qrupu
River Pleyt (Argentina) - Libertad (Paraqvay) 2:0
Borxa, 41; 84.
Deportivo Taçira (Venesuela) - Nasyonal (Uruqvay) 0:1
Kastro, 53.

1. River Pleyt 5 4 1 0 10-3 13
2. Nasyonal 5 3 1 1 7-5 10
3. Libertad 5 1 1 3 5-7 4
4. Deportivo Taçira 5 0 1 4 2-9 1
Bombardirlər: Paulinyo (Atletiko Mineyro), Silvera (Penyarol) - 5, Fransisko da Kosta (Bolivar) - 4.