Britaniya mediası serb fanatlardan çəkinir
Almaniyadakı qitə birinciliyi start götürdü.
“Football-plus.az” xəbər verir ki, hələ ki turnir ətrafında hansısa fanat qalmaqalı yaşanmır. Ancaq daim belə məqamlara münasibətdə həssaslıq göstərən Britaniya mediası ənənəsinə sadiqdi – bu dəfə həmkarlarımızın hədəfinə serb ultrası düşüb.
“Daily Mail” yazır:
“UEFA açıq-aşkar Avropa çempionatında ailə imicini inkişaf etdirməyə çalışır. Ancaq çətin ki, təhlükəli serblərin xuliqan bandaları İngiltərə yığmasını sevgi ilə qarşılaya. Məsələn, polisin ehtiyatlandığı “Kəllə ovçuları” və “Qəbirqazanlar” bazar günü axşam İngiltərə - Serbiya oyununa yollanacaq hər kəsə hücum çəkə bilər”.
Yazıda serbiyalı fanatlar ciddi zorakılıq təcrübəsinə malik adamlar kimi təsvir olunur – guya onların çoxu oğurliq, zorlama və qətl hadisələrinin iştirakçısıdı. “Daily Mail”in iddiasına görə, bəziləri siyasi zorakılıqda, bandit davalarını alovlandırmaqda və reketçilikdə suçlanır. İngiltərədə belə hesab edirlər ki, Belqrad “Partizan”nın ultrası, ümumiyyətlə, kluba məxsus olan ərazidə bunker tipli işgəncə yeri açıb.
Bu nəşr serbiyalı fanat İvan Boqdanovun (İvan Qroznı kimi tanınır) personasına xüsusi diqqət ayırıb, onun artıq Almaniyaya yollandığını bildirib:
“İngiltərəli azarkeşlərin əksəriyyəti Balkan ölkəsinin ən məşhur xuliqanı ilə üz-üzə gəlməyəcəyinə ümid edəcək. Axı o, İtaliyanın və Serbiyanın həbsxanalarında iki il keçirib”.
“The Guardian” vəziyyəti daha təmkinli şəkildə izah edir. Bu nəşr bildirir ki, Almaniyanın hakimiyyət orqanları həqiqətən Serbiya – Almaniya oyununu ictimai təhlükəsizliyin pozulması ehtimalı baxımından “yüksək risk” qrupuna daxil edib. Ancaq polisin əlində konkret bilgi yoxdu – hüquq-mühafizə orqanları, sadəcə, “zorakılıq axtaran” 400-500 adamın gəlişini gözləyir. “The Guardian” informasiyasına görə, say üstünlüyü serblərin xeyrinə olmacayaq – həmin gün stadionda 40 minə yaxın ingiltərəli və Serbiyadan 5-8 min arası qonaq olacaq. Amma yenə də polis lazımi tədbirləri görəcək və stadiona 1000 nəfərlik şəxsi heyət yollanacaq.
“Daily Mail” serb fanatlarla bağlı həyəcan təbili çalsa da, həmvətənlərinin əməllərini unudub. Əvəzində “The Guardian” məsələyə obyektiv yanaşıb. Həmin nəşrin əməkdaşı xatırladır ki, 1600-dən artıq ingiltərli fanat yaşayış yerində pasportunu təhvil verməli olub. Almaniyanın hakimiyyət orqanları əmindi ki, onlar final gününə qədər bu ölkəyə baş çəkə bilməyəcək. İki ölkə arasında bu məsələ ilə bağlı çox ciddi əməkdaşlıq var.
Hər iki nəşr əmin edir: istənilən halda qayda-qanunun qorunması üçün ən yüksək dərəcədə tədbirlər görüləcək. Hətta pilotsuz uçuş aparatları (PUA) ilə də mübarizə aparılacaq. Almaniya polisi xəbərdarlıq edir ki, PUA-ları havaya qaldırmaq qadağandı, hakimiyyət orqanlarının bunların qarşısını almaq üçün vasitələri var:
“Biz PUA-ları yerə enməyə məcbur edəcəyik”.
Qanun keşikçiləri ingiltərəli fanatları “on alman bombardmançısı” mahnısına görə cəzalandırmayacağını da vəd edib. Bu, Britaniya ultrasının repertuarında olan, almanların əleyhinə yönələn ən məşhur mahnılardan biridi. Polisdən belə deyiblər: “Axmaq mahnıdı, ancaq qadağan olunmayıb. Bun görə cəzalandırmayacağıq”.
Xatırladaq ki, Serbiya – İngiltərə oyunu bazar günü, iyunun 16-da keçiriləcək və Bakı vaxtı ilə 23.00-da başlayacaq.
Digər xəbərlər
