Təbii ki, Paris Olimpiadasında da Azərbaycanın medal ümidləri əsasən güləşlə bağlıdı. Bəs güləşçilərimiz Olimpiadaya necə hazırlaşır?

İyunun 24-dən iyulun 7-dək Serbiyanın Novi Sad şəhərində U-17 və U-20 Avropa çempionatı keçiriləcək. Bu yaş qrupu üzrə yığmalarımız müxtəlif məkanlarda təlim-məşq toplanışı keçir. Yeniyetmələrdən ibarət sərbəst güləş yığması iyunun 9-dan Xaçmaz Olimpiya İdman Kompleksində məskunlaşıb. Hazırlıq prosesi ayın 23-dək davam edəcək. Bu yaş qrupu üzrə yunan-Roma güləşi yığması iyunun 3-dən paytaxtda toplanışa start verib. Çalışmalara iyunun 19-da yekun vurulacaq. Qızlardan ibarət kollektiv də qitə birinciliyinə Bakıda hazırlaşır. Təlim-məşq toplanışı iyunun 9-24-ü aralığını əhatə edir.

Gənclərə gəlincə, sərbəst güləşçilər iyunun 2-dən Xaçmazdadı və ayın 12-dək Şimal bölgəsində məşqləri davam etdirəcək. Avropa çempionatı ərəfəsində son təlim-məşq toplanışı iyunun 16-dan iyulun 3-nə qədər Bakıda baş tutacaq. Mayın 22-dən iyunun 8-dək Göygöl Olimpiya İdman Kompleksində toplanış keçən gənc yunan-Roma güləşçilərimizin son hazırlıq prosesi iyunun 14-28-i aralığında Güləş Federasiyasının təlim-məşq bazasında təşkil ediləcək. Gənc qızlar da 16 iyun – 1 iyul aralığında Bakıda toplanış keçib, Novi Sada yollanacaq.
Qadınlardan ibarət əsas komandamız Macarıstana yollanıb. 10 günlük hazırlıq prosesi Tatada baş tutacaq. Ötən həftə həmin ölkədə keçirilən reytinq turnirində iştirak etmiş sərbəst güləşçilərimiz isə artıq vətənə qayıdıb. Komanda iyunun 12-dən Olimpiadaya hazırlığın növbəti mərhələsinə start verib. Ayın 26-dək Göygöldə fiziki hazırlığın yaxşılaşdırması məqsədilə toplanış həyata keçiriləcək. Yunan-Roma güləşçilərimiz də eyni məqsədlə Göygölə səfər edəcək. Bu komandamızın toplanışı iyunun 14-26-sı aralığını əhatə edəcək.

Sərbəst güləşçilərimiz iyunun 19-dan 23-dək Polşanın paytaxtı Varşavada keçiriləcək beynəlxalq turnirdə iştirak edəcək. Ənənəvi yarışda ölkəmizi məşqçilər Taymuraz Kokoyevlə Şərif Şərifovun rəhbərliyi altında Əli Rəhimzadə (65 kq), Zirəddin Bayramov, Sabir Cəfərov (hər ikisi 70 kq), Əşrəf Aşırov (79 kq), Osman Nurmaqomedov, Arseni Djioyev (hər ikisi 86 kq) və Abubakr Abakarov (92 kq) təmsil edəcək. Sərbəst güləş üzrə yarış iyunun 22-23-də keçiriləcək. Görüşlər hər gün Bakı vaxtı ilə 13.00-da başlayacaq. Turnirdə 2-ci dərəcəli beynəlxalq hakim Elgün Məmmədov ədaləti qoruyacaq.

Bu arada zədəli güləşçilərin bərpa prosesi də davam edir. Sərbəst güləş üzrə yığmanın heyətində yalnız Əliabbas Rzazadə zədəlidi. O, ötən həftə Macarıstanda keçirilən reytinq turnirində zədələnib. 57 kq-da Paris-2024-ə lisenziya qazanmış idmançının sol çiynindəki zədəsinin bərpa prosesi 10-15 gün çəkəcək. Əliabbasın müalicə ilə paralel fərdi məşqlərdə iştirakı gözlənilir.

Budapeştdəki yarışı zədə üzündən tamamlaya bilməyən Sənan Süleymanovla Ülvi Qənizadənin vəziyyəti də normaldı. Xroniki boyun zədəsinə görə ağrılar hiss edən Süleymanov Almaniyada qısamüddətli müayinədən keçdikdən sonra vətənə qayıdaraq Göygöl toplanışına qoşulacaq. Ülvo ilə yanaşı, reytinq turnirində müəyyən zədələrə görə iştirak edə bilməyən Nihat Məmmədli, Rafiq Hüseynov və Sabah Şəriəti də iyunun 14-dən 26-dək Qərb bölgəsində baş tutacaq hazırlıq prosesində yer alacaq.