Misli premyer-liqasının 36-cı turunda “Kəpəz” “Turan Tovuz”a məğlub olub - 0:1.

“Football-plus.az” xəbər verir ki, matçdan sonra gəncəlilərin baş məşqçisi Adil Şükürovun mətbuat konfransı keçirilib. Sizi onun fikirləri ilə tanış edirik:

- Növbəti mövsüm üçün komandada nə qədər dəyişiklik olacaq?
- Biz komandanı götürdüyümüzdən bu yana istədiyimiz çox şeyləri gördük. Bu futbolçularla istədiklərimizə nail olduq. Hədəfimiz odu ki, komandada olanların əksəriyyətini saxlayaq. Komandanı daha da gücləndirib, daha yaxşı yerlər uğrunda da mübarizə aparmaq niyyətindəyik. Bunun üçün də komandaya maliyyə dəstəyi lazımdı. İstəyirik ki, "Kəpəz"ə maliyyə dəstəyi olsun. Gəncə təmsilçisi yüksəklərdə olmağa layiqdi. Futbolçularımızın əksəriyyətini saxlamaq niyyətindəyik. Təbii ki, gedənlər olacaq. İstəmədiyimiz futbolçu yoxdu. Adama Nianenin müqaviləsi bitib. Bildiyim qədərilə onun özü başqa kluba keçmək istəyir. Buna etiraz etmirik. Nianeden başqa heç bir futbolçu ilə bağlı müraciət olunmayıb. Bu futbolçularla dibdən başladıq. Onlarla ayaq üstə qaldıqsa, elə onlarla da davam etmək istəyirik.

- İqor Rodriqesi istəyən komandalar az deyil. Onu saxlaya biləcəksiz?
- Futbolçularla danışmışıq. Hər biri də ilkin olaraq bildiriblər ki, bizdən cavab gözləyəcəklər. Məhz bundan sonra digər klublarla danışıq aparacaqlar. Amma birinci bizimlə danışacaqlar. Əksər legionerlərimizə, yerli futbolçularımıza aiddi. Ümidliyik. Maliyyə durumu nə yerdə olacaq, maraqlanmalıyıq. Federasiyadan ayrılacaq maliyyəni bilməliyik. Ondan sonra isə əlavə maliyyə dəstəyi olsa, nə yaxşı. Olmasa, ona uyğun işimizi quracağıq.

- "Kəpəz"ə sponsor tapılması məsələsi nə yerdədi?
- Ümumi müraciətimiz oldu. Komanda premyer-liqada qaldı, bunun üçün bir çox işlər gördük. Gələcəklə bağlı planlarımız da var. Bir daha bildirim ki, aidiyyəti orqanlar, insanlar var, onlardan xahiş edirəm komandaya dəstək olsunlar. "Kəpəz"in inkişafında yardımçı olsunlar. Komandanın özünə, adına layiq yerlərdə qərarlaşmasına köməklik etsinlər. Bu komanda inkişaf etməlidi. İmkanlar var. "Qəbələ"dən sonra məşq meydançalarının imkanına görə başqa komanda görmürəm.

- Sosial şəbəkələrdə İlqar Nadiri təndiq olunur, azarkeşlər ona vaxt verib. Özünüzə qarşı necə, basqı hiss edirsiz?
- Bu gün klubun belə vəziyyətdə olması, komandanın belə oynamasında rəhbərliyin, İlqar Nadirinin də şəxsən rolu var. Oyunlarda qalib gəldikcə, klub rəhbərliyi əlindən gələn hər şeyi edir. Bildiyim qədərilə, onun gücü çatmadığı imkanları belə, bizim üçün yaratdı. Dəstək görürük. Gəncə futbol camiəsini tanıyıram. Hər kəslə çox yaxşı münasibətim var. Hər bir kəslə görüşəndə də deyirəm ki, Gəncə veteranları, futbolsevərlərinin bir məqsədi olmalıdır ki, "Kəpəz" inkişaf etsin. Bunun üçün isə tənqidlərdən çox dəstək lazımdı. Komandada bəzi sıxıntılarımız var. Əlavə olaraq da, bu tərəfdən olacaq şeylər, komandaya stresdi. İnanıram ki, bunu da heç kəs istəməz.

- Növbəti mövsüm Gəncə stadionu da hazır olmayacaq. Harda oynayacaqsız?
- Bəli, nəzərimizdə iki stadion var. "Turan Tovuz"un və "Qəbələ"nin stadionlarıdı. Rəhbərlik də bu yöndə iş aparır. Əsas məsələ odur ki, maliyyəmiz nə qədər olacaq. Ona uyğun da planlaşdırma aparacağıq.