“Neftçi” Misli premyer-liqasının 36-cı turunda doğma meydanda “Sabah”a məğlub olaraq avrokuboklar uğrunda mübarizəsini dayandırdı.

“Football-plus.az” xəbər verir ki, “ağ-qaralar”ın baş məşqçisi Miodraq Bojoviç məğlubiyyətdən sonra oyun barədə fikirlərini bölüşüb və jurnalistlərin suallarını cavablandırıb:

- Necə düşünürsüz, analizlərdən danışmaq artıq gec deyil?

- Nə edə bilərəm? Mövsüm barədə danışırıqsa, deyə bilərik ki, uğursuzuq. "Neftçi" liqanı 5-ci yerdədirsə, demək ki, uğursuzluq var.

- Gələcək haqda planlarınız nədir? Bu komanda ilə nə edə bilərsiz?

- Bu suala cavab verə bilmərəm. Sadəcə bir az gözləmək lazımdı.

- Qarşınıza ikinci yeri tutmaq, kuboku qazanmaq məqsədi qoyulmuşdu. Amma heç nə edə bilmədiz. Tarixi klubu bu hala saldığınız üçün utanırsız?

- Nəticəyə görə məsuliyyət daşıyıram. Çempionatın ikinci hissəsində 29 xal qazanmışdıq. Mövsümün əvvəlində xal qazanmaq, liqanın ikinci yarısında qazanmaqdan daha asandı. Hər bir komandada uğursuzluq olur. Bəli, uğursuz olduq, günahkaram. Amma yeganə günahkar mən deyiləm.

- Hiss olunurdu ki, bir xal üçün oynayırsız. Yenidən oyuna başlamalı olsaydız, fərqli taktika seçərdiz?

- Biz bir xal üçün oynamırdıq. Bilirdik ki, "Sabah" əks-hücumlara yaxşı çıxır. Özümüz üçün boş sahələr axtarırdıq. Qol vursaydıq, qalib gələ bilərdik. Amma "Sabah"ın qapıçısı onları xilas etdi. Hakimə bildirdik ki, əvəzetməni hazırlamışıq, buna icazə vermədi.

- "Qarabağ"la görüşdən sonra mənə kiçik jurnalist demişdiz. "Neftçi" beşinci yeri tutdu, avrokuboklara yollana bilmədiz. Bu uğursuzuluğun fonunda özünüzü kiçik məşqçi hesab edirsiz, yoxsa böyük məşqçi?

- Boyum 1,96-dı. Hətta kiçik demək istəsəm də, boyum uzundu.

- Oyundan öncə "Neftçi"nin qadınlardan ibarət komandası və əvəzedicilər heyəti çempionluğu bayram edirdi. Bu, komandaya motivasiya verə bilmədi? Ola bilər ki, öz komandanızı oyuna yaxşı kökləyə bilmədiz?

- Qalib gələn komandalarımızı təbrik edirəm. Oyunçularım onsuzda motivasiyalıdı. Amma alınmadı.

- "Forza Neftçi" bir müddət əvvəl yenidən tribunalara qayıtdılar. Onların könlünü necə ala bilərsiz?

- İndi heç nə edə bilmərik. Yeni sezon klub daha yaxşı təşkilatlanmalıdır ki, Azərbaycan çempionatındakı əvvəlki roluna yenə qayıtmalıdı. Son matçda bizə dəstək olduqları üçün təşəkkür edirəm. Bu gün futbol atmosferi var idi.