Əziz Yıldırımdan Əli Koça sərt sözlər
“Fənərbaxça”nın sabiq prezidenti, 20 ilə yaxın klubun başqanı vəzifəsini icra etmiş Əziz Yıldırım iyunun 23-də mətbuat konfransı keçirib.
"Football-plus.az" xəbər verir ki, əslində Yıldırım srağagün “Habertürk” kanalınını canlı yayınına çıxacaqdı. Amma aparıcı xəstələndiyindən veriliş baş tutmadı. Bu üzdən Yıldırım özü mətbuat konfransı keçirməli oldu. 2 saatdan çox davam edən toplantıda sabiq başqanın sözlərinin ən önəmli məqamları ilə sizi tanış edirik:
“5 il öncəki seçkidən sonra “Fənərbaxça” ilə bütün əlaqəmi kəsdim. Amma məni rahat bıraxmırsız. Həyatımın qalan hissəsini daha xoşbəxt yaşamaq, zamanımı ailəmə və işimə sərf etmək istəyirəm. 5 il öncə Əli Koça səs verən klub üzvləri niyə qeybə çəkilib? Niyə ortaya çıxıb bir açıqlama vermirlər? 5 il öncə verilən sözlərin heç biri yerinə yetirilməyib! Əli Koç “namizəd çıxsa, seçkilər keçirərəm” deyərək bütün gün bağırır. İçinizdən biri ortaya çıxmır. Əslində “Habertürk”ün canlı yayınına çıxacaqdım. Aparıcı Mehmet Akif xəstələndi. Guya yerinə birini tapa bilmədilər. “Fənərbaxça”nın bu rəhbərliyi 5 ildi çox zəif və gücsüzdü. Tək Əli Koçla bu iş getməyəcək. Mənim 20 illik dönəmimdə idarə heyətində güclü, nüfuzlu isimlər var idi. Maddi, mənəvi hər cür dəstək verirdilər. Məsləhətlərini əsirgəmirdilər. Mən olmadıqda klubun haqqını qoruya bilirdilər. Yeri gələndə başqaları ilə dava edirdilər. İndiki idarə heyətində belə isimlər yoxdu. Ona görə də Koça seçkiyə getməyi, yenidən insanların etimadını qazanmağı məsləhət görürəm. Bizim dönəmimizdə 1999-da “Pendikspor”a udduzduqdan, 2006-da son turda çempionluğu əldən verdikdən sonra növbədənkənar seçkiyə getdim. Rəhbərliyi dəyişdim. 2006-dakı seçkidə Əli bəy də idarə heyətinə daxil oldu. Belə şeylərdən qorxmamaq lazımdı. Əli bəy seçkidə səs qazansa, artıq ilin sonuna qədər heç kim ona heç nə deyə bilməyəcək. 2024-dəki seçkidə mütləq ortaya bir namizəd çıxmalıdı. “Fənərbaxça” heç vaxt başqansız qalmayıb və qalmayacaq da. Klubun 50 min rəsmi üzvü var. Onlardan ən azı 15 mininin namizəd olmağa haqqı çatır. Əli Koç “məndən başqa namizəd yoxdu” düşüncəsi ilə hərəkət etməklə səhvə yol verir. Bu camiə çox böyükdü. Onu təhdid etmək olmaz. Heç kim ortaya çıxmasa, mən namizəd olacam! Belə də bilin. Əli Koç “namizəd yoxdu” deməklə həm özünü, həm də “Fənərbaxça”nı kiçildir. FETÖ-çülərdən, “hoca”lardan kiminsə namizəd olduğunu görsəm, yenə də özüm namizəd olacam. Bu insanlara bu klubda yer yoxdu! Məni ən çox üzən məsələ özümdən sonra 612 milyon avroluq borc qoyub ayrılmağımla bağlı ortaya atılan yalan iddialardı. Namusu, şərəfi olan insan bunu dilinə gətirməz. Biz stadionu yenilədik, “Topuk yaylası” bazasını tikdik, “Fənərium” dükanlarını açdıq, basketbol salonunu tikdik. Mətbuat niyə bunları yazmır? Amma biri çıxıb ortaya 612 milyon deyən kimi ona inanıb yazırsız. Bundan sonra bu mövzuda kim yalan danışacaqsa, məhkəməyə verəcəm. Biz ayrılanda borc 420 milyon avro idi. Həmin il 90 milyon avroluq gəliri də nəzərə alsaq, olur 330 milyon avroluq borc. Mən bu vəzifəyə gələrkən klubun stadiondan illik cəmi 14 milyon dollar gəliri var idi. İndi stadionun gəliri 40 milyon dollardı. Mən stadionu yeniləməsəydim, nə olacaqdı? Eybi yox, qoy, klubun mal varlıqlarını satışa çıxarsınlar. Mən hamısını alacam. Klubun borcunu sıfırlayacam. “Fənər”in borc batağlığında üzməsinin günahkarı indiki rəhbərlikdi. Borcları ola-ola, gedib Samet Akaydını aldılar. Başqa transferlər də etdilər. “Yapı Kredi”dən götürülən 50 milyon dollar hardadı? Ümumiyyətlə, Əli Koç kluba nə qədər pul xərcləyib? Sponsorlardan nə qədər gəlir əldə olunub? Bunların hamısı açıqlanmalıdı. 5 il ərzində 80-dən çox oyunçu alınıb və 10-dan çox məşqçi dəyişdirilib. Sadəcə, biabırçılıqdı”.
Digər xəbərlər
