“Neftçi” 2024/25 “futbol ili” üçün heyətin formalaşdırılması yönündə hərəkətə keçib.

“Football-plus.az”ın əldə etdiyi məlumata görə, cari mövsümdə hələ ki 39 qol buraxan “ağ-qaralar” bu dəfə daha yaxşı nəticə əldə etmək niyyətindədi. Klubun idman direktoru Yans Andersson bunu reallaşdırmaq məqsədilə “Zirə”nin qolkiperi Tyaqo Silvaya göz dikib.

Bilindiyi kimi, bakılıların heyətində hazırda üç qapıçı var. Bunlardan İvan Brkiç uzun müddət zədəli olduğundan çempionluq hədəfi üçün faydalı sayılmır. Aqil Məmmədovun isə karyerasını bitirəcəyi gözlənilir. Belədə Rza Cəfərov variantı qalır ki, gənc qolkiper bacarıqlı olsa da, növbəti mövsüm üçün əsas qapıçı kimi xidmət göstərməyəcək. Ondan, sadəcə, nisbətən zəif rəqiblərə qarşı matçlarda istifadə olunacaq.

Qeyd edək ki, “Neftçi” Tyaqonun transferi üçün “Zirə”yə müraciət etsə də, “qartallar”dan hələ müsbət cavab gəlməyib. Çünki qapıçının qəsəbə təmsilçisiylə müqaviləsinin müddəti 2025-ci ilin yayına qədərdi. Belədə xeyli düşünmək lazım gəlir. Klubun avrokuboklara vəsiqə qazanması real olduğundan təklifin dəyərləndirilməsi ertələnib.

KƏNAN BAHADIR