Peşəkar Çövkən Liqasının açılış mərasimi keçirildi
Binə Atçılıq Mərkəzində baş tutan tədbirdə Azərbaycan Atçılıq Federasiyasının prezidenti Elçin Quliyev, gənclər və idman naziri Fərid Qayıbov və digər rəsmilər iştirak edib.
ARAF-ın prezidenti Elçin Quliyev Qarabağ atlarının iştirakı ilə keçirilən bu turnirin Azərbaycanda çövkənin gənclər arasında təbliğatında böyük rol oynayacağını bildirib:
“Əsas məqsədimiz “Çövkən”i inkişaf etdirmək, təbliğ etmək və bu oyunun həvəskarlarını sevindirməkdir”.
Fərid Qayıbov çıxışında idmançılara uğurlar arzulayıb. O, Binə Atçılıq Mərkəzinin yerli və beynəlxalq yarışlara ev sahibliyi etməsinin çox sevindirici olduğunu diqqətə çatdırıb:
“Ölkə başçımızın idmana və idmançılarımıza xüsusi diqqət və qayğısı var. İdmançılarımız bizi daim sevindirir. Bu idman qurğusuna müxtəlif yerli və beynəlxalq yarışları izləməyə toplaşırıq. Bu yaxınlarda Beynəlxalq Çövkən Federasiyası yaranıb. Mən atçılıq federasiyasına təşəkkür edirəm ki, bu qədər aktivdirlər. İnanıram ki, bizim qələbələrimiz hələ qarşıdadı”.
Sonra yarış iştirakçılarının paradı nümayiş olunub. İdmançılar musiqi sədaları altında tribunaların qarşısından keçib. Ardınca Azərbaycanın Dövlət Himni səsləndirilib.
Ardınca müxtəlif uşaq və yeniyetmə qruplarının rəqs və çalğı ansamblı öz bacarıqlarını nümayiş etdirib.
RÖYANƏ OĞUZ
Digər xəbərlər
