"Səbail" Misli premyer-liqasının 29-cu turunda səfərdə "Qarabağ"i 2:4 hesabı ilə məğlub olub.

"Football-plus.az" xəbər verir ki, Bayıl təmsilçisinin baş məşqçisi Şahin Diniyev matçdan sonra keçirilən mətbuat konfransında jurnalistlərin suallarını cavablandırıb:

- Amerika kəşf etmək istəmirəm. "Qarabağ" premyer-liqa klublarından yuxarıdadı. İlk dəqiqələrdən rəqibə problem yaratmaq istədik. Qol da vurduq. Sadəcə, futbolçularım "Qarabağ"dan çəkindi. Topa nəzarət edə bilmirdik. İkinci hissədə "va bank"a getdik. "Qarabağ" səviyyəli komandadı, heyəti genişdi. Bu gün onlara 2 qol vurmaq da böyük işdi. Düzdü, bizə heç nə vermir. Amma komandada özünəinam yaradır. "Qarabağ"ı həm çempionluq, həm də beynəlxalq arenada göstərdiyi nəticələrə görə təbrik edirəm. 7 tur qalıb, şansımız var. Bunun üçün də mübarizə aparacağıq. Daha yuxarı yerlərə layiq komandayıq.

- "Kəpəz"in baş məşqçisi Adil Şükürov bildirmişdi ki, bütün komandalar"Qarabağ"la oyunda onların oyunçularını qorumağa çalışır. Siz necə düşünürsünüz?
- Bütün həmkarlarımın fikrinə hörmətlə yanaşıram. Düşünmürəm ki, biz bu gün "Qarabağ"ı qorumaq üçün meydana çıxmışdıq. Sona 7 oyun qalıb. Hər xal vacibdi. Aqressivliyimiz var idi. Sadəcə "Qarabağ" güclüdü. 1-2 futbolçunu bağlamaqla "Qarabağ"ı bağlamaq olmur. Hər komanda meydana xal üçün çıxır. "Qarabağ"la da oynamaq olar.

- Oyunda qırılma nöqtəsi qapınıza təyin olunan penalti idi?
- Orada heç kontakt yox idi. Oyunçu sürüşə-sürüşə rəqibin ayağına dəydi. Bəli, qırılma nöqtəsi idi. Qoldan sonra sistemi dəyişdik, dördlü müdafiəyə keçdik. Qol vəziyyətlərimiz oldu. 2-ci qolu vursaydıq, hesabı qorumağa gücümüz çatacaqdı.