Son günlərin əsas mövzusu AFFA-nın icraçı vitse-prezidenti Sərxan Hacıyevin Misli premyer-liqasının bu həftəsonu keçiriləcək bir və ya iki oyununda VAR-da əcnəbi hakimlərin olacağını təsdiqləməsidi.

Söhbətin “Sabah” – “Sumqayıt” (35-ci tur) və “Neftçi” – “Sabah” (36-cı tur) matçlarından getdiyinə şübhə etmirəm. İki yox, bir oyun olsa, bu, çox güman, Masazırda keçiriləcək görüş olacaq. Belə düşünməyimin səbəbi də məşhur “Sumqayıt”ı dartırlar” iddiasının AFFA-nın qulağına çatmasıdı.

Sözsüz, qərarın həm yaxşı, həm də pis tərəfləri var. Müsbət məqamlar bəlllidi. Belədə daha ədalətli idarəçilik görə biləcəyik. Oyunların taleyinə hakimin iradəsi yox, futbolçuların və məşqçilər korpusunun əziyyəti aydınləq gətirəcək. Yəni 90 dəqiqə ərzində özümüzü Avropada hiss edəcəyik!

Başqa məqamlar isə yeni rəhbərliyin şüuraltı mesajlarıdı. Sabiq rəhbərlik uzun illər ərzində hakimliyin səviyyəsinin yüksəlməsi yönündə ciddi uğur əldə edə bilməyib. Yoxsa biz əcnəbilərə ehtiyac duymazdıq. Bu, həm də müəyyən gözləntiləri olan şəxslərdən vaxt istəməkdi. “Hakimliyin dirçəlməsi üçün bizə uzun vaxt lazımdı. Hər şeyə sıfırdan başlayırıq” deməkdi. “Əliyar Ağayev və Elçin Məsiyev kimi ən təcrübəli, ən şan-şöhrətli hakimlərimiz, sadəcə, 1-ci liqanın həlledici matçlarını idarə edəcək səviyyədədi” deməkdi!

Həm də o deməkdi ki, AFFA öz “tərəzi”sinə güvənmir. Bəs azarkeşlər niyə güvənsin?!

KƏNAN BAHADIR