Premyer-liqada VAR hakimlərinin əcnəbi olacağı təsdiqləndi
AFFA-nın baş katibi Sərxan Hacıyev Misli premyer-liqasının bu həftəsonu keçiriləcək 1 və ya 2 oyununda VAR-da əcnəbi hakimlərin olacağını təsdiqləyib.
“Football-plus.az” xəbər verir ki, icraçı vitse-prezident bununla bağlı “CBC Sport”da yayımlanan “Bizim futbol” verilişində danışıb.
O bildirib ki, avrokuboklar zonasında gərgin mübarizənin getdiyini nəzərə alaraq AFFA bu cür addım atıb:
“Qərara alınıb ki, hər hansısa bir fors-major hadisə olmayacağı təqdirdə ilk dəfə bu həftəsonu keçiriləcək 1 və ya 2 oyuna beynəlxalq VAR hakimi dəvət olunsun. Oyunlarda bizim meydanda hakimlərə köməklik etsin. Belə bir təcrübə VAR-la bağlı ilk dəfə həyata keçiriləcək. Bu günədək beynəlxalq VAR hakimi Azərbaycan premyer-liqasında hər hansısa oyuna təyinat almayıb. Bunun da matçlara müsbət təsir edəcəyini düşünürəm. Nəzərə alsaq ki, yarışın bitməsinə 2 tur qalıb. Həlledici oyunlar var. Müəyyən komandaların avrokubok talelərini həll edəcək bir neçə matç qalıb".
Hacıyev VAR hakimlərinin hansı ölkədən olacağı ilə bağlı bu dəqiqə açıqlama verə bilmədiklərini, hakimlərin adlarının turdan bir gün öncə açıqlana biləcəyini deyib.
Digər xəbərlər
