“Bilindiyi kimi, Peşəkar Futbol Liqası ilə “YAŞAT” fondu arasında memorandum imzalandı. Bu müqavilə əsasında biz Azərbaycan Respublikasının ərazi bütövlüyü uğrunda canlarından keçmiş şəhid övladlarına sağlam həyat tərzinin təbliğiylə bağlı müəyyən öhdəlik götürmüş oluruq və PFL-in bayrağı altında keçirilən tədbirlərdə şəhid övladlarının iştirakını təmin edəcəyik. İdmanın şahı olan futbola, onların marağının daha da artırılmasına və peşəkar futbolçu kimi yetişmələrinə müəyyən töhfələr verəcəyimizi düşünürük. Belə proseslərdə təşəbbüsün kimdən gəlməsi, məncə, çox qabardılmamalıdı. Əsas məqsəd və vəzifələrdi. Başlıca məqsədimiz bu təşəbbüsün həyata keçirilməsi və davamlı olmasıdı. PFL-in tərəfdaş şirkətlərini də bura cəlb etməklə bu işi daha dayanıqlı və davamlı etməyi düşünürük. İlk addım kimi “YAŞAT” fondu və “Badamlı” şirkətinin birgə təşkilatçılığı ilə Qəbələ şəhərində Beynəlxalq Uşaqlar Gününə həsr olunmuş, 5 gün müddətində sağlam həyat düşərgəsi təmin edəcəyik”.