“Mən də legioner həyatı yaşamaq istəyirəm” - Elvin Nəsibov “Cəbrayıl”la oyunu gözləyir
Bilindiyi kimi, ölkə çempionatının ayrı-ayrı liqalarında mübarizənin bitməsinə bir neçə tur qalıb.
Rəqabət son həddə çatıb. Yüksək yerlər uğrunda mübarizə 2-ci liqa komandalarını bir-birinə qatıb. “Füzuli” də sona iki tur qalmış çempionluq şansını qoruyur. Bu komandanın hücumçusu Elvin Nəsibov bombardirlər siyahısında yalnız Tural Qurbatovdan geri qalır. Tural 30, Elvin isə “Cəbrayıl”la “Füzuli”nin heyətində 24 qol vurub.
Bəs təcrübəli, 28 yaşlı hücumçunun karyerası ilə bağlı hansı planları var? O, “Futbol+”ə açıqlamasında həm hədəflərindən, həm də mövsümün sonuna olan planlarından danışdı:
“Bombardirlər cədvəlində 2-ci olmaq mənim üçün böyük əhəmiyyət daşımır. Ona görə ki, əsas fikrim oyunlarda maksimum komandama kömək etmekdi. Qol vurmaq mənim işimdi. Çalışıram ki, hər oyunda komandama fayda verim. Çempionatda güclü rəqabət gedir. Məqsədimiz son iki oyunda yaxşı nəticə göstərib 1-ci liqaya yüksəlməkdi. Amma hər şey sonuncu turda bilinəcək “Cəbrayıl”la finala bərabər bir oyunumuz var”.
Nəsibov gələcək karyerasına da aydınlıq gətirdi:
“Hələ heç bir komandadan təklifim yoxdu. Bu haqda indilik bir plan da fikirləşməmişəm. Çünki diqqətimizi çempionata yönəltmişik. Mövsümün sonunda təklif olsa, onda fikirləşməyə vaxtımız olacaq. Hər bir futbolçu kimi, mən də legioner həyatı yaşamaq istəyərəm. Şərtlər razı salsa, ölkə xaricinə yollana bilərəm”.
RÖYANƏ OĞUZ
Digər xəbərlər
