“Yəqin ki, komandada böyük dəyişikliklər olmayacaq” - Baxşıyev “Araz-Naxçıvan”ın gələcəyindən danışdı
Cari mövsümdə uğursuzluğa düçar olan komandalardan biri də “Araz-Naxçıvan”dı.
Qış fasiləsindən sonra eniş yaşayan klubda sular durulmur. Ötən ay Elmar Baxşıyevlə anlaşan “qırmızı-ağlar” az qala hər gün özünü yeni söz-söhbətlərin içində tapır. 43 yaşlı məşqçinin rəhbərliyi altında 4 matça çıxan, 3 məğlubiyyət, 1 qələbə ilə yadda qalan Naxçıvan təmsilçisinin oyunu heç də ürəkaçan deyil. Üstəlik mövsümün sonuna yaxın 8-ci yer də əldən gedib.
Son günlər Elmar bəyin sələfi Azər Bağırovun işindən narazı olmasıyla bağlı xəbərlər gəzir. Guya futbolçuların çıxışından tutmuş klubda qurduğu sistemə qədər hər şey bərbad olub. Maraq üçün bildirək ki, Baxşıyevlə Bağırov 6 ay “Qəbələ”də çiyin-çiyinə çalışıb. Yəni 2020-ci ilin yanvarından iyuluna kimi bərabər fəaliyyət göstəriblər. Xatırlatmaq yerinə düşər ki, Azər bəy klubdan ayrılandan sonra verdiyi açıqlamalarda yeni məşqçiyə və komandaya uğur arzulamışdı. Bəs Elmar Baxşıyev nədən narazı qalıb? Sualı birbaşa mütəxəssisin özünə ünvanladıq. Elmar bəy məsələyə belə reaksiya verdi:
“Komandaya yeni gəlmişəm. Nə narazılıq ola bilər?! Yeni komandadı, gəlmişəm və burdayam. Gələcəkdə nə olacaqsa, ondan danışacağıq. İşim əvvəlki məşqçini müzakirə etmək deyil. Komandada yaxşı futbolçular var. Gələcəkdə hansısa dəyişikliklər olacaqsa, düşünüb planlı şəkildə həyata keçirəcəyik. Burda məşqçinin işini müzakirə etmək fikrində deyiləm. Hələ 3 tur qalıb. Yayla bağlı planlar tərtib edəcəyik. Mövsümün bitməsini gözləyirik. Çempionatın sonunda rəhbərliklə danışıb, nəticəyə uyğun hərəkət edəcəyik. Yəqin ki, komandada böyük dəyişikliklər olmayacaq. Yaxşı futbolçular var. Sadəcə, müəyyən yeniliklər olacaq”.
RÖYANƏ OĞUZ
Digər xəbərlər
