“Əvvəlcə onu qeyd edim ki, azarkeşlərin stadiona gəlməsi, tribunalara cəlb edilməsi həmişə “Sabah”ın prioritetlərindən biri olub. Bu istiqamətdə işləri müntəzəm davam etdiririk. Oyunlardan öncə fanzonanın təşkil edilməsi, Masazırda və ətraf qəsəbələrdə təbliğat işlərinin aparılması və başqa addımların atılması məhz buna hesablanıb. Son oyunumuzda sponsorlarımızın dəstəyi ilə azarkeşlər üçün müsabiqə təşkil edildi. Bütün bunlar insanlarda çempionat oyunlarına marağın yaradılmasına, stadiona gəlmələrinə hesablanıb. Deyim ki, son illərdə görülən işlərin nəticəsi statistikada özünü göstərir. “Sabah” gənc klub olmasına baxmayaraq, ev oyunlarına gələn tamaşaçı sayına görə premyer-liqada ilk sıralarda yer alır. Belə təşəbbüslərdə dərhal nəticə tələb etmək də düzgün deyil. Necə ki illərlə görülən iş nəticəsində çempionatda ev oyunlarına gələn tamaşaçı sayına görə ilk sıralarda yer almışıq, həmçinin stadiona indikindən daha çox azarkeşin cəlb edilməsi üçün də müəyyən zamana ehtiyac var. Hazırda oyunlarımıza gələn azarkeş sayı çempionatda olan orta azarkeş sayından geri qalmır ki, üstələyir. Daha yaxşı nəticəyə nail olmaq üçün isə dediyim kimi, müəyyən zamana ehtiyac var”.