Vadim Vasilyev iş yox, yardım istəyir
“Neftçi”nin veteranı, yığmamızın sabiq üzvü Vadim Vasilyev srağagün sosial şəbəkə hesabından izləyicilərə müraciət etdi.
Bir neçə ay əvvəl insult keçirdiyinə görə sağlıq durumunda məhdudiyyətlər yaranan “ağ-qaralar”ın məşhur siması kart hesabını paylaşdı, yardım istədi:
“Rebyata, nujdayus v vaşey pomoşi! OQROMNOE spasibo za otzıvçivost” (uşaqlar, köməyinizə ehtiyacım var. Həssaslığınına görə sağ olun).
Futbol ictimaiyyəti paylaşıma biganə yanaşmadı, müraciətə səs verərək yardım etməyə çalışdı. Dövrünün sayılıb-seçilən futbol adamının çətin vəziyyətdə qalması, belə çağırış etməsi isə heç də xoş qarşılanmadı. Etiraf etmək lazımdı ki, onun spirtli içkilərə meyilliyi barədə də söz-söhbət gəzir. Ümumiyyətlə, Vadim nə istəyir? Tənqid edilən növbəti məqam isə sabiq oyunçunun birbaşa kart hesabını paylaşmasıdı. İllərdi işsiz qalan, futbolun daşını atıb “dincələn” Vasilyevə niyə AFFA-da və ya onun üçün doğma olan “Neftçi”də bir iş verilmir?
Suallarımıza cavab tapmaq üçün Vadimlə əlaqə saxladıq:
“Hazırda evdəyəm, müalicəmi davam etdirirəm. AFFA xəstəxana xərclərimi ödəməyə kömək etdi. Ancaq dərman və fizioterapiya lazımdı. Ona görə maddi dəstək üçün səsləndim. İndi iş tapmaq çətindi. Mənə maddi cəhətdən dəstək lazımdı. Əsas istəyim səhhətimin əvvəlki vəziyyətə qayıtmasıdı”.
RÖYANƏ OĞUZ
Digər xəbərlər
