Bir neçə klubun şərəfini qorumuş veteran futbolçu Vadim Vasilyevin bir neçə gün öncə insult keçirdikdən sonra reanimasiyaya yerləşdirilib.
Onun son durumu haqda məlumat öyrənmək üçün AFFA-nın İnformasiya və İctimaiyyətlə Əlaqələr Departamentinin rəhbəri Elnur Məmmədliylə əlaqə saxladıq:
“Vadim Vasilyevlə bağlı xəbər bizə daxil olan kimi AFFA prezidenti Rövnəq Abdullayevin tapşırığına əsasən veteran futbolçu özəl hospitallardan birinə yerləşdirilib və onun bütün müalicə xərcləri AFFA tərəfindən ödənilir. AFFA rəhbərliyi milli komandamızın sabiq üzvünün müalicəsini daim diqqət mərkəzində saxlayır. Bu günə olan məlumata görə, Vadim Vasilyevin vəziyyəti sabit-orta kimi qiymətləndirilir. Yəni hansısa həyati təhlükəsi yoxdu. Doğrudu, hələ ki veteran futbolçu reanimasiyadadı. Bu da onunla bağlıdı ki, təzyiqi sabit deyil. Həkimlər də bildirir ki, təzyiqi sabitləşən kimi Vadim Vasilyev palataya köçürüləcək. Həkimlərin dediyinə görə, insultdan sonrakı vəziyyəti normal sayıla bilər. Sol qolunda və sol ayağında hərəkətin və hissiyyatın pozulması var, amma ümumilikdə müalicədə müsbət dinamika müşahidə olunur”.
KAMAL SƏFƏR