"Qarabağ" Misli premyer-liqasının 29-cu turunda öz meydanında "Səbail"i 4:2 hesabı ilə məğlub edib.

"Football-plus.az" xəbər verir ki, Ağdam təmsilçisinin baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavablandırıb:

- Futbolçularımı təbrik edirəm. Baxımlı oyun oynadılar, xeyli sayda qol epizodlarımız oldu. Mövsümün sonuna yaxınlaşmağımıza baxmayaraq, futbolçularda istək var idi. Şahin Diniyevə uğurlar arzulayıram.

- Sarı vərəqə görməyiniz nə ilə bağlı idi?
- Hakimlər oyunun tempini ləngidir. Bəlkə biz kənardan düz görmürük. Amma oyunun bu qədər durması yaxşı hal deyil. Futbolçular dinamikaya uyğunlaşmalıdı. Hər iki komanda üçün deyirəm. Hər epizoda sarı vərəqə vermək olmaz. Hakimlər düşünməlidi ki, ikinci sarı vərəqə ola bilər. Buna etirazımı bildirdim. Vurulan qollarda bilmirəm ofsayd var idi, yox idi. Torala sarı vərəqə verir. Dayanıb mübarizə aparmalı deyillər ki. Bu hallara öyrəşmək lazımdı. Oyunun sürəti artan kimi pauza verilir.

- Mövsümün sonunda müqaviləsi bitən futbolçular var. Onlarla bağlı qərar vermisiz?
- Vaxtımız var. Qarşıdakı günlərdə bu işlərlə məşğul olacağıq. Düzgün qərarlar qəbul etmək istəyirik. Hər biri bizim əzizimizdi.

- Kubokun finalında kiminlə qarşılaşmaq istəyərdiz?
- İnanın ki, finalı düşünmürəm.

- Andrey Lunyov haqda son günlər mətbuatda yazılar çoxdu. Onunla bağlı durum necədi?
- Bəzən bir insan fikir bildirəndə emosiyalarını saxlaya bilmir, sərt danışır. Mən buna fikir vermirəm. Lunyovla bağlı böyüdüləsi bir şey yoxdu. Bizimlə müqaviləsi var. Müəyyən danışıqlar olub. Son günlərdəki yazılara uyğun heç nə yoxdu. Hər şey qaydasındadı.