"Bu gün ölkə futbolunun ən möhtəşəm günlərindən biridi. Hesab edirəm ki, bu, nəinki illik, son 16 ilin hesabatına bənzəyən konfransdı. Mən belə qəbul edirəm. İllər keçir, Azərbaycan futbolu inkişaf edir. Buralara haradan gəlib çıxdığımızı unutmamalıyıq. 30 il əvvəl mən Prezident Aparatında çalışırdım. Bir hadisə baş verdi. Azərbaycan İsraillə oynamalı idi. Lakin heç bir stadionumuz qəbul olunmadı. Ulu öndər maraqlandı, məni də çağırdılar ki, niyə Azərbaycanda bir stadion yoxdu ki orda oyun keçirək? Onda Ulu öndərə Tofiq Bəhramova adına Respublika Stadionunun şəkillərini göstərdilər. Futbol meydançasında qoyunlar otlayırdı. Ulu öndər dedi ki, Sumqayıtda gözəl stadion tikmişdik, o stadion nə vəziyyətdədi? Dedilər o da elə durumdadı ki, beynəlxalq oyunlar keçirmək olmaz. Məcburiyyətdən Trabzonda oynadıq. Bunu nəyə görə yada salıram? Bu gün çox güclü futbol infrastukturumuz var. Azərbaycan futbolda müəyyən mənada sözünü demiş ölkədi. Son illərdə “Qarabağ”ın nəticələrini böyük sevinc hissi ilə yaşayırıq. Bunlar hamısı son 15-16 ildə həyata keçirilmiş tədbirlərin nəticəsidi. Ona görə də yeni seçiləcək heyətə uğurlar arzu etməklə yanaşı, bu dövrdə əziyyət çəkmiş, Azərbaycan futboluna hərtərəfli dəstək olmuş insanlara təşəkkür edirəm. Onların əməyidi ki, bu durumdayıq. Düzdü, mediada tənqidlər olur. Hətta millinin oyunlarından narazılıqlar var. Tənqid iş olan yerdədi. Milli Olimpiya Komitəsində buna adət etmişik. Olimpiya çempionlarının sayı artdıqca tənqidlərin də sayı artır. Bu normal hadisədi. Ümid edirəm ki, Azərbaycan futbolu bundan sonra da inkişaf edib, yeni-yeni nailiyyətlər qazanacaq".