“FIFA series – Edition 2024” layihəsi çərçivəsində keçiriləcək Azərbaycan – Bolqarıstan oyunundan öncə mətbuat konfransı təşkil olunub.

"Football-plus.az" xəbər verir ki, matçdan öncə Bolqarıstan millisinin baş məşqçisi İlian İliyev görüşlə bağlı fikirlərini bölüşüb. Sizi onun düşüncələri ilə tanış edirik:

"Azərbaycanın Monqolustanla oyununa tam baxmamışam. Fraqmentləri izləmişəm. Azərbaycan dominant oyun sərgilədi. Kifayət qədər şansları var idi və layiqli qələbə qazandılar".

- Siz həm də "Çerno More"nin baş məşqçisiz. Maraqlıdı, Azərbaycan millisinin üzvü olan Cəlal Hüseynovu izləmisiz?
- Bəli, bu futbolçunu yaxşı tanıyıram. Yaxşı keyfiyyətə malik, istedadlı futbolçudu.

- "Çerno More"dən söz düşmüşkən, vaxtı ilə sizin rəhbərliyiniz altında oynamış "Qarabağ"ın futbolçuları Leandro və Patrik Andrade ilə Bakıda görüşmüsüz?
- Bəli, Leandro ilə görüşmüşəm. Patrik isə Kabo-Verde millisinin heyətindədi deyə, onunla görüşmək imkanımız olmadı.

- Azərbaycan sabah evdə oynayacaq və qələbə üçün meydana çıxacaq. Bu, sizin üçün təzyiqdi?
- Əminəm ki, bu turnir qarşıdan gələn Millətlər Liqası öncəsi bizə kömək olacaq. Azərbaycanın güclü tərəflərini yaxşı bilirik.

- Son görüşlərdə Macarıstan və Serbiya ilə 2:2 oynamışdınız, Tanzaniyanı isə 1:0 məğlub etdiniz. Azərbaycana məğlubiyyət Bolqarıstanda tənqidlərə yol açacaq?
- Həmin oyunlardakı nəticələrə görə müsbət məqamlar əldə etdik. Tanzaniya ilə matçda da müsbət məqamlar var idi. Tənqid məsələsinə gəlincə, bundan əmin ola bilmərik. Fikirlər tək nəticə üzərindən yürüdülmür. Biz bu haqda düşünmək istəmirik. Sabahkı oyunda qələbəyə köklənmişik.

- Azərbaycandakı təşkilatçılıq necədi?
- İndiyə kimi təşkilatçılıq mükəmməldi. Bu yarışa qatılmaq şərtlərimizdən biri o idi ki, hər şey yüksək və peşakar səviyyədədi.