“FIFA series – Edition 2024” layihəsi çərçivəsində keçiriləcək Azərbaycan – Bolqarıstan oyunundan öncə mətbuat konfransı təşkil olunub.

"Football-plus.az" xəbər verir ki, millimizin futbolçusu Emin Mahmudov matçla bağlı fikirlərini bölüşüb. Sizi onun düşüncələri ilə tanış edirik:

- A millidə yerli mütəxəssislə çalışmaq yaxşıdı, yoxsa xarici mütəxəssislə?
- Mən yerli ilə də işləmişəm, xarici ilə də. Hamı ilə münasibətim yaxşı idi. Keçmiş məşqçilərə qarşı nəsə demək istəmərəm. İkisi də yaxşıdı.

- Monqolustanla matçda qol epizodlarından istifadə edə bilməsəniz də, tənqidləri qəbul etmirsiz...
- Kim dedi ki, tənqidi qəbul etmirik, mən qəbul etmirəm?

- Söhbət komandadan gedir...
- Biz hamımız tənqidləri qəbul edirik.

- Bolqarıstanla oyunda uğursuz nəticə olsa nə deyəcəksiz?
- Motivasiya sarıdan problem yoxdu. Heç vaxt olmayıb. Maksimumu edəcəyik ki, yaxşı oyun göstərək. Hər oyun vacibdir. Başa düşürük ki, Monqolustan kimi komandalara çox qol vurmalıyıq. Alınmadı.

- Sabah səndən qol gözləyək?
- Gözləyək. Əsas komandanın qalib gəlməsidi.

- Milli tarixində yeni bombardir ola bilərsən..
- Motivasiya həmişə olmalıdı. Rekordu qırmaq asan iş deyil. Bir qolum qalıb. Çalışacam ki, qolum xeyir versin. Bəzi matçlarda qol vursam da, komandaya xeyir verməyib.

- Millətlər Liqasında bizimlə eyni qrupda yer almış Qazaxıstan millisi pley-off mərhələsinə çıxdı. Biz nə vaxt bu addımı atacağıq?
- Bir az çətin sualdı. Azərbaycan futboluna dərinə getməlisən ki, biləsən niyə onlarda alınır, bizdə yox. Biz Qazaxıstanı səfərdə də uda bilərdik. Daha yaxşı oyun göstərdik. Onlar qalib gələrək motivasiya ilə davam etdilər, qrupu yaxşı keçdilər. Biz o oyunu yaxşı oynasaydıq, bizdə də yaxşı şanslar olardı. Amma deyə bilmərəm ki, Qazaxıstan bəxt sayəsində oralara gedib çıxdı. İşləyiblər, yaxşı oyun göstəriblər. Qazaxlar kimi eyni nəticənin bizdə də olmasına çalışacağıq. Amma bunun nə vaxt olacağını deyə bilmərəm. Çox istəyərdim ki, yaxın gələcəkdə olsun.