“Formula-1” Türkiyəyə qayıdır?
Beynəlxalq Avtomobil Federasiyasının (FIA) prezidenti Məhəmməd ben Sulayem Türkiyə prezidenti Rəcəb Tayyib Ərdoğanla görüşüb.
“Motorsport”un yaydığı xəbərə görə, görüşdə federasiyanın avtoidman üzrə Ümumdünya şurasının üzvü Sərkan Yazıçı və Türkiyə Avtomobil İdmanı Federasiyasının prezidenti Ərən Ülkərtorpağı da iştirak edib.
Ben Sulayem görüşdən sonra belə deyib:
“Prezident Ərdoğanla görüş mənim üçün çox xoş oldu. Danışıqlarımız müxtəlif mövzuları əhatə etdi. Biz “Formula-1”in Türkiyəyə dönüşü imkanını müzakirə etdik. “İstanbul Park” pilotlar arasında populyarlıq qazanan müasir trassdı. Prezident Ərdoğan da dünya səviyyəli avtoidmanın ölkəyə göstərdiyi iqtisadi və mədəni təsirin əhəmiyyətini qeyd etdi”.
Xatırladaq ki, “Formula-1” üzrə dünya çempionatının mərhələsi Türkiyədə 2005-11-ci illər aralığında və 2020-21-ci illərdə keçirilib.
Digər xəbərlər
