Emil “Turan”dan istədiyini aldı
Millimizin qapıçısı Emil Balayevin vaxtilə formasını geydiyi Qazaxıstan təmsilçisi “Turan”ı FİFA məhkəməsinə verdiyini demişdik. Klub azərbaycanlı futbolçuya təzminat ödəməliydi.
Lakin üzərinə düşəni yerinə yetirmədiyi üçün transfer qadağasına məruz qalmışdı. “Turan” artıq Emilə ödəməli olduğu məbləği ödəyib. Balayevin bu məhkəmə prosesindəki uğurunda əsas pay sahibi olan Elcan Həsənliylə əlaqə saxladıq:
“Bildiyiniz kimi, klub oyunçuya müqavilənin ləğv edilməsinə görə təzminat ödəməlidi. Bu proses icra olunmadığına görə FİFA-ya müraciət etdik. Bundan sonra FİFA-nın Mübahisələrin Həlli Palatası Emilin xeyrinə qərar verdi. 45 gün ərzində klub bu məbləği ödəmədi. Ardından FİFA-nın İntizam Komitəsinə müraciət etdik və kluba transfer qadağası qoyuldu. Bu qərardan sonra klub üzərinə düşən öhdəliyi yerinə yetirdi. Bu barədə biz FİFA-ya məlumat verdik. Yəqin ki, transfer qadağası klubun üzərindən götürüləcək. Məbləğ məsələsinə gəlincə, təəssüf ki, bunu deyə bilmərəm”.
Təcrübəli hüquqşünas eyni zamanda Tural Bayramlının da vəkili olduğu üçün “Səbail”in təzminatı ödəyib-ödəmədiyini və bunun üçün məhkəməyə müraciət edib-etməyəcəklərini soruşduq:
“Ümumiyyətlə, bu məsələdə ödəniş olunmayanda İdman Arbitraj Məhkəməsinə (CAS) müraciət etmək barədə tərəflərin elə bir hüququ yoxdu. Biz yalnız AFFA-ya müraciət edib, kluba qarşı hansısa sanksiya verməsini tələb edə bilərdik ki, AFFA-nın qanuna minmiş qüvvəsini icra eləmir. Buna görə İntizam Komitəsinə müraciət edə bilərik”.
KAMAL SƏFƏR
Digər xəbərlər
