“Turan” Emil Balayevi aldatmaq istəyib: bu müddət ərzində ödəniş edilməyib
"Emil Balayev 2022-ci il iyunun 30-da Qazaxıstanın “Turan” klubu ilə müqaviləsini ləğv etməyə qərar vermişdi”.
Bu sözləri “Football-plus.az”a açıqlamasında tanınmış hüquqşünas Elcan Həsənli dedi. Emil Balayevin vəkili futbolçunun “Turan”a qalib gəlməsi haqda danışdı:
“Bunun müqabilində klub Azərbaycan millisinin üzvünə konpensasiya ödəməliydi. Bundan sonra “Turan”a vaxt verilmişdi. Ödəniş məbləği dövrlərə bölünmüşdü ki, klub borcunu ödəsin. Bir il ərzində “Turan” hansısa ödəniş etmədi. Bundan sonra yeganə yolumuz FIFA-nın Mübahisəli məsələlərin Həlli Palatasına müraciət etmək oldu. Avqustun 2-də bu addımı atdıq. Noyabrın 2-də isə qərar qəbul olundu. Bizim üçün müsbət məqam idi. Çünki FIFA futbolçumuzun xeyrinə qərar qəbul edib. Yəni “Turan” müqavilə üzrə qəbul edilən bütün şərtləri yerinə yetirməlidi”.
Elcan bəy Emil Balayevin “Turan” üzərindəki qələbəsinin Azərbaycanın da idman hüququna müsbət təsir edəcəyini bildirdi:
“Təbii, bizim üçün sevindirici haldı ki, artıq futbolçularımız hüquqlarını müdafiə etmək üçün rəsmi qurumlara, vəkillərə müraciət edirlər. Ölkənin idman hüququ adına irəliləyişdi. Emil Balayev məsələsi Azərbaycan idmançıları üçün motivasiyaverici qərar olacaq. Onlar başa düşəcəklər ki, FIFA-ya, İAM-a müraciət edəndə qalib gələ bilirlər. Ümid edirəm ki, bu məsələ yerli hüquq orqanları üçün nümunə olar. AFFA-nın Futbolçuların Statusu və Transferi Komitəsi, Apellyasiya Arbitraj Tribunalı oyunçuların hüquqları ilə bağlı qərar verərkən bu işləri nəzərə alarlar. Bu, bütün idmançılar və klublar üçün vacib elementdi”.
İLKİN SULTANLI
Digər xəbərlər
