Misli premyer-liqasında 23-cü tura start verilib.

Bildiyiniz kimi, “Qəbələ” – “Qarabağ” oyunu qarşılıqlı razılıqla fevralın 28-nə ertələnib. “Köhlən atlar” fevralın 22-də keçiriləcək “Braqa” ilə cavab görüşünə daha rahat hazırlaşmaq istəyir. Qalan oyunlardan ikisi bu gün, ikisi sabah keçiriləcək. “CBC Sport” oyunları canlı təqdim edəcək.

Misli premyer-liqası
3-cü dövrə, 23-cü tur
18 fevral
Sumqayıt – Turan Tovuz 0:0
“Sumqayıt”ın bu rəqiblə ev oyunlarının balansı: 3:+1=2-0, 2:1.
2022/23 – 0:0, 2:1; 2023/24 – 0:0.
Cəzalı: yoxdu.
“Futbol+”in proqnozu: 30-40-30.
Hakimlər: RAUF CABBAROV, Namiq Hüseynov, Müslüm Əliyev, Kamranbəy Rəhimov.
Hakim-inspektor: Ömər Paşayev.
AFFA nümayəndəsi: Seymur Səlimli.
Sumqayıt. Mehdi Hüseynzadə adına şəhər stadionu. Saat 15.30.

Samir Abasovun komandasının “Mehdi Hüseynzadə”yə dönüşü yadınızdadı. “Neftçi” üzərində 2:1 hesablı qələbəni unutmamışıq. İkinci matçda da əsas məqsəd rəqibi məğlub etmək olacaq. İlk “dördlük”dəki komandalar arasında xal fərqi çox deyil. Belə durumda axsamaq arzuolunmazdı. Şübhə yoxdu ki, “Sumqayıt” 6 oyunluq məğlubiyyətsizlik seriyasınının qırılmasını istəmir. Ümumiyyətlə, “gənclik şəhəri” təmsilçisi son 11 turda, sadəcə, “Qarabağ”a məğlub olub (1:6). Başqa rəqiblərə qarşı amansız davranan kollektiv bu dəfə də bütün gücünü meydanda qoyacaq. “Turan Tovuz”a gəlincə, bölgə təmsilçisinin xüsusi hədəfi yoxdu. Premyer-liqanı tərk etmək istəməyən komanda üçün hansısa təhlükədən bəhs etməyə də dəyməz. Buna baxmayaraq, Ayxan Abbasovun yetirmələri sürpriz etməyi sevir.

Komandalar indiyə qədər 6 dəfə üz-üzə gəlib. Bunların 2-də “Sumqayıt”, 1-də “Turan Tovuz” qalib gəlib. 3 oyunda hərəyə 1 xal düşüb. Topların nisbətində “kimyaçılar” öndədi – 7:6.

Neftçi – Zirə 1:0
Ervin Koffi, 11
“Neftçi”nin bu rəqiblə ev oyunlarının balansı: 16:+7=6-3, 24:14.
2015/16 – 1:1, 0:0; 2016/17 – 0:1, 1:2; 2017/18 – 1:2, 1:1; 2018/19 – 2:2, 4:2; 2019/20 – 3:0; 2020/21 – 0:0, 4:0; 2021/22 – 2:1, 1:1; 2022/23 – 2:1, 1:0; 2023/24 – 1:0.
Cəzalı: Ruan Renato (Zirə).
“Futbol+”in proqnozu: 40-30-30.
Hakimlər: ƏLİYAR AĞAYEV, Zeynal Zeynalov, Akif Əmirəli, Əli Əliyev.
Hakim-inspektor: Babək Quliyev.
AFFA nümayəndəsi: Emin Cəfərov.
Bakı. “Neftçi Arena”. Saat 18.00.

“Neftçi” son turlarda göstərdiyi oyunla yenidən qınaq obyektinə çevirib. Miodraq Bojoviçin gəlişindən sonra bir müddət susan azarkeşlər yenidən narazılıq edir. “Oda benzin tökən” məqam isə bakılıların ötən həftə debütant “Araz-Naxçıvan”a məğlub olmasıdı. Vəziyyət elədi ki, uduzmağın bədəli daha ağır olacaq. Hər halda, “ağ-qaralar” yuxarı pillələrdən aşağı yuvarlanmaq istəməz. Yəni komandanın qalib gəlməkdən başqa çarəsi yoxdu. Yoxsa təzyiq dözülməz həddə çatacaq. Əslində “Zirə”ni də eyni aqibət gözləyir ki, matça prinsipiallıq qatan məqam məhz budu. Qəsəbə təmsilçisi Avropa meydanlarında çıxış etmək hədəfindən uzaq düşmək istəmir. Odu ki, bu görüşdə gərginlik son həddə olacaq desək, yanılmarıq. Görək, son 11 “Neftçi” səfərində qələbəyə həsrət qalan “qartallar” bu dəfə nə edəcək?
Ümumiyyətlə, komandalar indiyə qədər 32 oyunda rəqib olub. Bunların 11-də “Neftçi”, 12-də “Zirə” qalib gəlibsə, 9-da “sülh” qeydə alınıb. Topların nisbətində “ağ-qaralar” öndədi – 36:30.

17 fevral
Sabah – Kəpəz 3:1
Kahim Parris, 38. Cesse Sekidika, 55. Kristian da Silva, 79 - Martins Junior, 6.
“Sabah”ın bu rəqiblə ev oyunlarının balansı: 3:+2=1-0, 9:2.
2022/23 – 5:0, 2:0; 2023/24 – 2:2.
Cəzalılar: Anatoli Nuriyev (Sabah), Vurğun Hüseynov (Kəpəz).
“Futbol+”in proqnozu: 40-30-30.
Hakimlər: ELÇİN MƏSİYEV, Elşad Abdullayev, Pərvin Talıbov, Nicat İsmayıllı.
Hakim-inspektor: Rəhim Həsənov.
AFFA nümayəndəsi: Eldəniz Musayev.
Bakı. “Bank Respublika Arena”. Saat 16.00.

Turun ilk oyununa Masazırda şahidlik edəcəyik. Burda Murad Musayevin gedişindən sonra oyun tərzində müəyyən dəyişikliklər edilən “Sabah” “Kəpəz”i qəbul edəcək. “Bayquşlar” son üç oyundakı nəticələrlə “mən də varam” deyir. İndi isə “Kəpəz”i məğlub etmək lazımdı. Belədə “Sabah” ilk “beşliy”ə doğru ciddi addım atılmış olacaq. Qələbə qonaqlar üçün də həyati önəm daşıyır. Gəncəlilər Adil Şükürovun rəhbərliyi altında ötən həftə ilk böyükhesablı məğlubiyyətini yaşadı (“Səbail” – 1:4). Başverənlərin “sarı-göylər”in enişinin başlanğıcı, yoxsa qəza olub-olmadığı bir neçə saat sonra bilinəcək. Hər halda, “Kəpəz” toparlanmalı və “Qəbələ” ilə aradakı xal fərqinin azalmasına imkan verməməlidi. Belə olsa, gəncəlilər tarixində ilk dəfə “Sabah”ı məğlub edəcək.

Komandalar indiyə qədər 6 oyunda üz-üzə gəlib. Bunların 4-də “Sabah” qələbə qazanıbsa, 2-də qalib müəyyənləşməyib. Topların nisbətində “tələbələr” öndədi – 16:4.

Səbail – Araz-Naxçıvan 2:2
“Səbail”in bu rəqiblə ev oyununun balansı: 1:+1=0-0, 1:0.
2023/24 – 1:0.
Cəzalı: yoxdu.
“Futbol+”in proqnozu: 30-30-40.
Hakimlər: KAMRAN ƏLİYEV, Vüsal Məmmədov, Rəhman İmami, Tural Qurbanov
Hakim-inspektor: Zöhrab Qədiyev.
AFFA nümayəndəsi: Yavər Rəhimov.
Bakı. “ASCO Arena”. Saat 18.30.

Bayıl təmsilçisi 4 turu əhatə edən qələbəsiz seriyaya Gəncədə son qoydu. Şahin Diniyevin komandası uğurların davamını doğma meydanda gətirməlidi. Yeni transferlərdən sonra müəyyən çatışmazlıqlar aradan qalxıb. “Dənizçilər”in avrokuboklar uğrunda mübarizə apardığını və şansların getdikcə azaldığını nəzərə alsaq, mümkün 3 xalın gələcək üçün önəmli yatırım olduğuna şübhə yoxdu. Üstəlik komanda qələbə qazanacağı təqdirdə bir pillə yüksələ bilər. Axı 3-cü pillədəki “Neftçi” ilə 4-cü pillədəki “Zirə” qarşılaşacaq. “Səbail” isə “qartallar”dan cəmi iki xal geri qalır. Yəni o matçın istənilən nəticəsi Bayıl təmsilçisinə sərf edəcək. Odu ki, fürsətdən maksimum yararlanmaq lazımdı. Amma və lakin... “Araz-Naxçıvan” da rəqibi kimi dörd tur idi “qələbə orucu tutmuşdu”. Nəhayət, “ağ-qaralar”ı minimal hesabla məğlub edərək durumu düzəltdi. Muxtar Respublika təmsilçisi də məhz qələbə üçün döyüşəcək. Çünki “Səbail”lə eyni xala (30) malikdi və ilk “dördlüy”ə düşmək uğrunda mübarizə aparır. “Araz-Naxçıvan” həm də Şahin Diniyevin komandası üzərində ilk qələbəsini qazanmaq istəyəcək.

Tərəflər indiyə qədər iki dəfə qarşılaşıb. Birində Bayıl təmsilçisi 3 xala yiyələnibsə, digərində “sülh” qeydə alınıb. Topların nisbətində meydan sahibləri öndədi – 2:1.

1. Qarabağ 22 16 3 3 55-20 51
2. Sumqayıt 23 9 9 5 23-25 36
3. Neftçi 23 10 5 8 26-21 35
4. Zirə 23 8 8 7 14-13 32
5. Sabah 23 7 6 8 33-28 31
6. Səbail 23 8 7 8 34-35 31
7. Araz-Naxçıvan 23 8 7 8 26-28 31
8. Turan Tovuz 23 8 6 9 36-33 30
9. Kəpəz 23 5 5 13 20-40 20
10. Qəbələ 22 4 3 15 15-39 15

Bombardirlər: Olavio Juninyo (Qarabağ) – 15, Aleksandr Ramalinqom (Səbail) - 10, Yassin Benzya (Qarabağ) – 8, Pedro Nuno (Səbail), Orxan Əliyev (Araz-Naxçıvan) – 9.

KƏNAN BAHADIR