Rumıniyanın paytaxtı Buxarestdə davam edən güləş üzrə Avropa çempionatında dünən maraqlı hadisə baş verib.

“Football-plus.az” xəbər verir ki, Ukraynanı təmsil edən azərbaycanlı güləşçi Pərviz Nəsibov mükafatlandırma mərasimindən sonra Rusiyanı təmsil edən erməni Narek Ohanyanla şəkil çəkdirməkdən boyun qaçırıb. Nəsibovla Ohanyan 72 kq çəki dərəcəsində bürünc medal qazanıblar. Xatırladaq ki, həmvətənimiz Ülvi Qənizadə bu çəki dərəcəsində finalda türkiyəli Səlcuk Cana uduzub.

Medallar təqdim olunandan və çempion güləşçinin şərəfinə Türkiyə himni səslənəndən sonra güləşçilər fəxri kürsüyə qalxıb ki, birgə şəkil çəkilsin. Ancaq Pərviz ayağını fəxri kürsüyə qoymayıb. Ohanyan oranı tərk edəndən sonra Nəsibov fəxri kürsüyə qalxaraq Səlcukla Ülvinin əlini sıxıb.