Nəhayət, Kilian Mbappe seçimini edib. O, PSJ ilə müqaviləsini yeniləməmək qərarına gəlib. Başqa sözlə, hücumçu mövsümün sonunda komandanı azad agent kimi tərk edəcək.

Kilianın rəhbərliyin daha cəlbedici şərtlərini geri çevirdiyini əksər beynəlxalq informasiya mənbələri xəbər verir.

DÇ-2018-in qalibi məlum qərarı ilə 100 milyon avroluq bonusdan imtina edib. Maraq üçün onun PSJ-də illik məvacibinin 72 milyon avro olduğunu da bildirək.
Mbappenin artıq karyerasını “Real”da davam etdirmək qərarına gəldiyi də məlum olub. Onun bu haqda həftəiçi açıqlama verəcəyi bildirilir. Amma dünya çempionunun İspaniya klubu ilə aparacağı danışıqların asan keçməyəcəyi də vurğulanır. Belə ki, “Real” rəhbərliyinin ona Fransada qazandığı qədər maaş və bonuslar ödəməyə hazır olmadığı qeyd edilir.

İkinci ciddi məsələ isə futbolçunun bu yay Parisdə keçiriləcək Olimpiadada iştirak arzusu ilə bağlıdı. PSJ ona bu fürsəti verməyə hazırdı. Amma madridlilərin bu mövzuda fərqli düşündükləri məlumdu.