Cahangir Ağarəhimov FİDE tərəfindən ilin ən yaxşı məşqçisi adına layiq görülüb. Onun yetirmələri müxtəlif yaş qrupları üzrə Avropa çempionatının qalibi və medalçısı olub. 2022-ci ildə Cahangir bəyin tələbəsi, beynəlxalq qrossmeyster Abdulla Qədimbəyli 20 yaşadək gənclər arasında dünya çempionatının qalibi adını qazanıb.

"Football-plus.az" olaraq, təcrübəli mütəxəssislə əlaqə saxlayıb fikirlərini öyrəndik.

- 2023-cü ildə hansı yetirmələriniz uğur qazanıb? Konkret kimlərin adını çəkə bilərsiz?
- Ötən ildən başlayaraq Gövhər Beydullayevaya kömək edirəm. Rapid üzrə dünya çempionatından öncə Gövhəri mən hazırlaşdırdım və dünya çempionu oldu.

- Yetirmələriniz arasında gələcəyin Şəhriyarı, Teymuru varmı?
- Bunu heç kim deyə bilməz. Şahmat elə bir elmdi ki, hadisələrin axarından, dinamik inkişafdan aslıdı. Çox istedadlı, 8 yaşlı Avropa çempionlarımız var.

- Abdulla Qədimbəylinin daha nüfuzlu turnirlərə qatılmaq, qalib gəlmək şansını necə görürsüz? 20 yaşadək gənclər arasında özünü göstərdi. Bu, gecikmiş uğur deyilmi?
- Sonuncu yaş qrupudu, bütün güclülər orda yığılır və daha sonra böyük şahmata keçirlər. Abdulla təkcə 20 yaşlılar yox, 8, 10 yaşlılar arasında da dünya çempionu olmuşdu. Yeniyetmələr arasında ikiqat dünya çempionudu. Ölkəmizdə Abdulla Qədimbəylidən öncə belə uğura yalnız Şəhriyar Məmmədyarov imza atıb.

- Apreldə İddiaçılar Turnirinə qatılacaq Nicat Abasova hansı tövsiyələri verə bilərsiz?
- Təbii ki, Nicatın öz məşqçi heyəti var. Yüksək səviyyədə hazırlıq gedir. İnanırıq ki, Dünya kubokunda olduğu formaya qayıdıb, çox gözəl oyunlarla bizi sevindirəcək. Nicat Torontoda da Bakıdakı kimi oynasa, istədiyi nəticəni göstərə bilər.

- Ümumiyyətlə, ölkəmizdə gələcəyin dünya çempionlarını yetişdirə biləcək mütəxəssislər varmı?
- Əlbəttə! Hətta adlarını da çəkə bilərəm. Aydın Süleymanlını məhz Fərid Abbasov kəşf edib, onunla birlikdə dünya çempionu olub. Fərid bəyin rəhbərliyi altında 16 yaşadək komandamız dünya çempionu olmuşdu. Rəsul İbrahimov dünya çempionu Məhəmməd Muradlı və Günay Məmmədzadənin məşqçisidi. Anar Allahverdiyev əməkdar məşqçi, çox istedadlı biridi. Şahmat Federasiyasının dəstəyi ilə əcnəbi mütəxəssislər də ölkəmizdə işləyir, güclü məşqlər gedir. Ona görə də inanıram ki, inkişaf dinamikası həmişə yüksək olacaq, şahmatçılar gələcəkdə bizi daha yaxşı nəticələrlə sevindirəcək.

GÜNAY SÜLEYMANOVA