Bu oyun ərəfəsində hər iki komandanın düşərgəsində yeniliklərə şahid olmuşduq.

“Neftçi” Mutunu qış fasiləsində yola salıb, “sükanı” Miodraq Bojoviçə tapşırmışdı “Qəbələ” isə illərin təcrübəsi Səbuhi Səfiyarlını idman direktoru postuna gətirməklə böhrandan çıxmaq yolunda ciddi addım atmışdı. Düzdü, “Neftçi”nin baş məşqçisi Miodraq Bojoviç “Sabah”la oyunda rəsmi debütünü reallaşdırmışdı. “Neftçi”nin həmin görüşü Masazırda keçirdiyini nəzərə alsaq, qəbul etməliyik ki, bizim çempionata isnişməyə çalışan əcnəbi mütəxəssis ilk dəfə doğma meydanda oynamağın həyəcanını yaşayırdı.

İtirməyə heç nəyi qalmayan “Qəbələ” oyuna heç də pis başlamadı. Turnir cədvəlində sonuncu olan “qırmızı-qaralar”ın bundan sonra hər qarşılaşmaya final ab-havasında çıxacağı məlum məsələdi. “Neftçi” ilə görüş də o sıradan vacib görüşlərdən biri idi. İlk 10 dəqiqədə “Qəbələ” özünü heç də qonaq kimi aparmadı. Zədə səbəbindən meydana çıxa bilməyən Brkiçi əvəzləyən Rza Cəfərovun qoruduğu qapıya doğru qonaq komanda bir neçə dəfə təhlükəli həmlə edə bildi. Bu dəqiqələr ərzində “Neftçi” Atanqanı və “Qəbələ”yə könül verən azarkeşləri həyəcanlandırmağı bacarmamışdı. 13-cü dəqiqədə oyunda məcburi fasilə yarandı. Məlum oldu ki, baş hakim İnqilab Məmmədovun köməkçiləri ilə əlaqəsini təmin edən rabitə qurğusunda problem yaranıb. Problem aradan qaldırıldıqdan sonra hər şey qaldığı yerdən davam etdi. 16-cı dəqiqədə Koffi sağ cinahdan sürətlə cərimə meydançasına daxil olsa da, topa yetişə bilmədi. Bundan bir dəqiqə sonra Atanqana iki cəhddə məharətini göstərməli oldu. Rəhman Hacıyevin o qədər də təhlükəli olmayan zərbəsini ispaniyalı qapıçı məhz iki cəhddən sonra ram edə bildi.

Hissənin ortalarına doğru komandaların fəallığı bir qədər səngidi. Düzdü, “Qəbələ”nin təzyiqi hiss olunurdu. Bununla belə, təhlükəni böyütmək heç də asan görünmürdü. 23-cü dəqiqədə Rza ustalığını göstərərək, Auaşeriyanın yaxın məsafədən vurduğu zərbəni dəf edə bildi. Buna qədər isə yan xətt hakiminin ofsaydı işarə edən bayrağı havaya qalxmışdı. 26-cı dəqiqədə Azər Salahlının başla ötürməsindən sonra Emin Mahmudov təhlükə yaratmağa yaxın oldu. Lakin Osama onun qarşısını kobudluqla alaraq, epizodun davamına imkan vermədi. Cərimə zərbəsindən sonra “Qəbələ”nin qapısı önündə qarışıqlıq yaransa da, Azərin zərbəsindən sonra oyundankənar vəziyyət qeydə alındı. Dəqiqələr irəlilədikcə komandalar daha ehtiyatla oynamağa çalışırdı ki, bunu da başa düşmək çətin deyildi. Həm “Neftçi”, həm də “Qəbələ” çalışırdı ki, fasiləyə qədər qapısının toxunulmazlığını qorusun. Qış fasiləsinə sonuncu pillədə yollanan “Qəbələ”nin “Neftçi”yə qarşı cəsarətli oynaması, rəqibdən çəkinməməsi də maraqlı görüntü idi. Hissənin son 10 dəqiqəsində top əsasən mərkəz dairəsininin ətrafında fırlanırdı, qapıya doğru həmlələr isə təsadüfi xarakterli olur, zəif zərbə ilə yekunlaşırdı.

41-ci dəqiqədə “Neftçi”nin qazandığı küncə zərbəsi də bu qəbildən oldu. Eminin qapıya doğru havalandırdığı topa komanda yoldaşlarından toxunan olmayınca “Qəbələ”nin qapıçısı təhlükəni çətinlik çəkmədən sovuşdurdu. İki dəqiqə sonra Salahlının kobud oyunundan sonra “Qəbələ” cərimə zərbəsi vurmaq hüququ qazansa da, bu şansdan istifadə etmək mümkün olmadı. Hiss etmək çətin deyildi ki, komandalar meydana xüsusi taktiki hazırlıqla çıxmayıb, “ev tapşırığı”ndan isə danışmağa heç dəyməzdi. Bütün bunların fonunda komandaların fasiləyə qolsuz yollanması heç də təəccüblü olmadı. İlk hissəyə əlavə olunmuş dəqiqə bitər-bitməz İnqilab Məmmədov futbolçuları fasiləyə yolladı.

Nəfəsini dərən futbolçular həlledici hissə üçün yenidən meydan çıxdı. Amma ikinci yarının startı da elə ilk hissəyə bənzəyirdi. “Qırmızı-qaralar” meydan sahiblərinə nisbətən fəal görünür, “Neftçi” isə xoşbəxtliyi əks-hücumlarda axtarırdı. Ümumilikdə komandaların bərabərsəviyyəli olduğu aşkar görünürdü. Bu mənada kimin sonuncu pillədə yer almasını, kimin mükafatlar uğrunda mübarizə apardığını görüntüyə əsasən müəyyənləşdirmək çətin idi. 53-cü dəqiqədə “Neftçi” hesabı açmağa yaxın oldu. Amma Atanqana ardıcıl iki epizodda məharətini göstərdi. 3 dəqiqə sonra “Qəbələ”nin qapısı qarşısında növbəti təhlükə yaşandı. “Neftçi”nin iki futbolçusu topu boş qalan qapıya göndərə bilmədi. Amma qarışıqlıqda Oçiqava Tamaşın formasından çəkib yerə yıxdı ki, bunun da “mükafatı” qırmızı vərəqə oldu. Epizoda VAR-da baxan İnqilab Məmmədov “Qəbələ”nin qapısına penalti təyin etdi. “Nöqtə”yə yaxınlaşan Emin Mahmudov büdrəmədi.

Hesab açılandan sonra say üstünlüyünə də yiyələn “Neftçi” daha rahat oynamağa başladı. Elmar Baxşıyev isə müdafiəçi İlkin Qırtımovu meydana buraxmaqla müdafiəni gücləndirməyə çalışdı. Bununla belə, 67-ci dəqiqədə “Neftçi” ikinci qolu vurdu. Rəhman Hacıyevin ötürməsini Valdes gözəl və gözlənilməz zərbə ilə qapıdan keçirdi. Həm sayca, həm də hesabda rəqibini üstələyən “Neftçi” bir qədər arxayınlaşdı ki, 87-ci dəqiqədə də bunun cəzasını çəkdi. Xalaylanın zərbəsini Rza dəf etsə də, düzgün mövqe seçən Emil Səfərov topu tora qovuşdur. Amma bu da oyunda sonuncu qol olmadı. Əsas vaxta artırılan 5-ci dəqiqədə Moreno oyundakı sonuncu qolu vurdu.

Gözdən qaçmadı
* Oçiqavanın qırmızı vərəqə aldığı epizodda Osama Xalayla, Urfan Abbasov və Murad Musayev hakimə və "Neftçi"nin futbolçularına etiraz bildirirdi. Yuri Matias onlarla söhbət edib sakitləşdirməyə çalışdı.
* Urfan butslarını İnqilab Məmmədova göstərərək, "bax, bax, buna bax" dedi. O, ədalət təmsilçisinin "Qəbələ"nin əleyhinə təyin edilən cərimə zərbəsi qərarıyla barışmaq istəmirdi.
* "Forza Neftçi" və "Neftçi Mania" növbə ilə fərqli nəğmələr oxuyur, şüarlar səsləndirirdi. "Red-Black Army" isə rəqibin ikinci qolundan sonra dəstəyi dayandırdı. 85-ci dəqiqədə, ümumiyyətlə, komandaya arxa çevirərək "formanı çıxarın, rədd olun, gedin!" dedilər.
* Emil Səfərov qol vurandan sonra dərhal qapıçı Rzadan topu alıb mərkəza aparmaq istədi. Lakin qolkiper topu qəsdən küncə atıb oyunun bərpasını ləngitdi.
* Yeni transfer Brayan Moreno debüt, Emin Mahmudov isə 19-cu matçında mövsümün ilk qoluna imza atdı.
* Bojoviç yetərincə qəzəbli idi. O, kiçik səhvlərə belə emosional reaksiya verirdi. Baxşıyev isə təmkinli davranır, bəzi epizodlarda yan xətt hakiminə etiraz bildirirdi.