Bazar günü futbol üzrə ölkə çempionatında mövsümün ikinci yarısına start verildi.

Mükafatçılar sırasına düşməyə iddialı “Sumqayıt” – “Qəbələ” ilə səfərdə keçirdiyi oyunda qalib gəlməyi bacardı. Bu qarşılaşmanın taleyini bir penalti qolu həll etdi. Özü də futbol ictimaiyyətini ikiyə bölən penalti... Bəs “Sumqayıt” qış fasiləsində heç bir tansfer etmədən iddiasını qoruya biləcəkmi? Bu komanda ilə bağlı bir çox suala aydınlaşdırmaq üçün Qəbələdə kapitan sarğısını taxan Elvin Bədəlovla danışdıq.

- Təlim-məşq toplanışından dönəndən sonra ilk oyunda qələbə qazandız. Komanda belə hava şəraitində heç də yorğun görünmədi. Bunu Antalyadakı məşq prosesinizin ağır keçməməsi ilə bağlamaq olarmı?
- Oyunun çətin keçdiyini deyə bilərəm. Doğrusu, elə bunu da gözləyirdik. Çünki Qəbələdəki oyunlar həmişə belə olur. Kəskin hava şəraitini işimizi da da çətinləşdirdi. Amma əsas nəticədi və buna da nail olduq. Növbəti oyunlarımızın daha yaxşı olacağına inanıram.
- İlin ilk rəsmi matçında komandanın kapitanı sən idin. Bu məsuliyyətin, baş məşqçinin meydandakı nümayəndəsi kimi üzərinə düşən vəzifənin öhdəsindən gələ bildin, yoxsa oyunundan narazı qaldığın məqamlar oldu?
- İlk dəfə deyil ki, meydana kapitan kimi çıxıram. Əlbəttə, kapitan kimi daha da məsuliyyətli olursan və çalışırsan ki, daha yaxşı oyun nümayiş etdirib komanda yoldaşlarına nümunə olasan. Əlimdən gələni artıqlamasıyla edirəm və hər görüşdə maksimum nəticə göstərməyə çalışıram. Sözsüz, daha da yaxşı ola bilərəm.
- Oyundan söz düşmüşkən, “Qəbələ” oyunçuları penaltinin haqsız olduğunu düşünür. Səncə, hakim belə qərar verməkdə haqlı idi?
- Məncə, haqlı qərar idi. Çünki həm laysmanlar, həm baş hakim, həm də VAR-da olan hakimlər tez qərar verdi. Bu sevindirici haldı. Buna görə də başqa nəsə deməyə ehtiyac olmadığını düşünürəm.
- Hər transfer dönəmində yerli oyunçulara tələbat yüksəkdi. Bəs qış “transfer pəncərəsi”ndə sənə təkliflər oldumu? Eyni zamanda gələcək karyeranla bağlı nə düşünürsən? Legioner həyatı yaşamaq istəyərsən?
- Bütün fikrim “Sumqayıt”ladı və bu haqda danışmağa dəyməz. Çünki müqaviləmin müddəti növbəti ilin sonuna qədərdi. Həm də burda xoşbəxtəm.
- Komandada bu transfer dönəmində durğunluq hökm sürür. Səncə, heyətinizdə olan oyunçular istədiyiniz performansı sərgiləmək üçün kifayətdi? Yoxsa hansısa mövqeylərdə çatışmazlıqlar var?
- Əlbəttə, həmişə heyətin geniş olmasını istəyirsən. Komandaya yeni nəfəs, xeyir verə biləcək futbolçular gəlsə, sadəcə, sevinərik. Amma bu heyətlə də maksimum nəticəni göstərməyə çalışacağıq.
- Ümumiyyətlə, “Sumqayıt”ın bu mövsüm üçün əsas hədəfi nədi? Heç bir transferin olmaması irəlidə problemlərə səbəb olmayacaqmı?
- Sözsüz, hədəfimiz maksimum nəticə göstərməkdi. Avropa Liqasına düşə bilsək, bu, bizim üçün böyük uğur sayılar. Yeni oyunçular transfer olunsa da, olunmasa da, işimiz çətin olacaq. Çünki bu il çempionat çox gərgin keçir.
- Bir çoxu “Qarabağ” çempion olacağı fikriylə razıdı. Çempionluğa iddialı komandalardan biri kimi siz də bu düşüncədəsiz?
- Mən də bu mövsüm “Qarabağ”a rəqib olmadığını düşünürəm, çox güclüdü. Biz isə hələ ki onların səviyyəsinə çatmamışıq. Ona görə çempionluq barədə heç danışmağa dəyməz. Hər il addım-addım irəliləsək, bizim üçün xoşdu.

KAMAL SƏFƏR