Dünya futbolunda özünəməxsus sərt mübarizəsiylə seçilən futbolçular çox olub.

Məsələn, Serxio Ramos, Pepe, Paolo Maldini, Cennaro Qattuzo... Siyahını genişləndirə bilərik. Elə Azərbaycan futbolunun tarixinə baxanda da yetərincə sərt oynayan futbolçuların olduğunu görərik. Əsgər Abdullayevin məşhur “sürüşümə” fəndi bütün SSRİ-yə səs salmışdı. Müstəqillik dönəmində isə Aslan Kərimov, Füzuli Məmmədov sərt oynayan, hücumçulara aman verməyən müdafiəçi imici ilə tanınıb. İndi də gənc, mayda 25 yaşını tamamlayacaq “Turan Tovuz”un müdafiəçisi Faiq Hacıyev onların yolu ilə gedir. Təbii ki, onun Misli premyer-liqasının 12-ci turunda – “Səbail”lə səfər matçında Ağabala Ramazanovla sərt mübarizəsindən, ikincinin ölümün astanasından döndüyünü bilirsiz. Dərhal xəstəxanaya götürülən Ağabala noyabrın 3-dən bəri müalicə alır, sirr deyil ki, hətta futbolçu karyerasını davam etdirməsi də sual altındadı, Türkiyə ilə Azərbaycan arasında yollarda qalıb. Görünür, sərt oynamaqdan zövq alan Faiq bazar ertəsi “Kəpəz”lə keçirilən qarşılaşmada “sürüşmə” fəndi tətbiq edərkən yenə ehtiyatsız davrandı. Daha doğrusu, bu fəndi elə işlətdi ki, az qala rəqibin iki futbolçusunu “biçəcəkdi”. Xoşbəxtlikdən Mate Kvirkviya zərbədən yayına bildi, amma Hacıyev Amil Yunanovu yerə sərə bildi və haqlı olaraq, qırmızı vərəqə ilə cəzalandı. “Turan Tovuz”un məğlubiyyətinin əsasən bu “qırmızı” ilə bağlı olduğu aydındı. Amma Ayxan Abbasovun yetirməsinə “qulaqburması” verib-vermədiyini bilmirik. Əlbəttə, bu yazıda məqsədimiz Faiqi “qaralamaq” deyil. Çünki, o, öz mövqeyində, doğrudan da, yaxşı futbolçulardan biridi. Sadəcə, sərtliyin də bir həddi olmalıdı. Gənc futbolçu hərəkətlərinə çəki-düzən versə, daha yaxşı olar. İlk növbədə ona görə ki, bir başqa azərbaycanlı futbolçu da Ağabalanın mənhus taleyini yaşamasın. İkincisi, belə fəndlərə əl atanda ən pis variantı, yəni özünün də hətta karyeranı bitirməyinə səbəb ola biləcək zədə almaq ehtimalını nəzərə almaq lazımdı. Seçim sənindi, Faiq!

KAMAL SƏFƏR