Aprelin əvvəlində İtaliya kubokunun ilk yarımfinal oyunları keçirildi.

“Football-plus.az” xəbər verir ki, “Yuventus” evdə “İnter” üzərində qələbəni son dəqiqədə əldən verdi (1:1), “Fiorentina” isə səfərdə “Kremoneze”nin qapısından iki cavabsız top keçirdi. Finala vəsiqə yalnız kuboku qazanmaq şansı deyil, həm də maliyyə planında irəli düşmək fürsətidi. Bundan sonra finalda uduzacaq komandanın da heç də az olmayacaq bonus qazanmaq imkanı olacaq. Doğrudu, bonus dərhal xəzinəyə daxil olmayacaq.

Superkubokun formatı dəyişdi
İtaliya Superkubokunun bu il yanvarın 18-də keçirilən oyunu əzəli rəqiblərdən birinin böyükhesablı qələbəsi ilə nəticələnmişdi. A seriyasının son çempionu “Milan” Səudiyyə Ərəbistanının paytaxtı Ər-Riyadda baş tutan matçda vitse-çempion “İnter” qarşısında aciz qalmışdı – 0:3. Bu, çempionun ölkə kubokunun sahibi ilə keçirdiyi sonuncu Superkubok dueli idi. Artıq yarışın formatı dəyişib. Müqaviləyə əsasən, 2017-21-ci illərdə nəzərdə tutulan 5 turnirdən 3-ü Səudiyyə Ərəbistanında təşkil ediləcək.
Bəs yeni formatın əsas detalları necə olacaq? “La Gazzetta dello Sport” bu suala aydınlıq gətirir:

* Superkubokun iştirakçılarının sayı 4-ə qədər artırılıb: növbəti mövsümdən çempion və ölkə kubokunun sahibinə vitse-çempionla İtaliya kubokunun finalçısı da rəqib olacaq. “Yuventus” və “Fiorentina” böyük ehtimalla cari mövsümü 2-ci yerdə başa vura bilməyəcək, “Kremoneze” də həmçinin. Ancaq kubokun yarımfinalında qazanılacaq uğur bu komandalara Superkubokda yarışmaq hüququ verəcək.
* İtaliya kubokunun finalında qələbə qazanacaq klub 4,5 milyon avro irəli düşəcək, məğlub isə 2 milyon avro ilə kifayətlənəcək. Təşkilatçılar Superkubokun “4-lər finalı” üçün 23 milyon avro mükafat ayıracaqlar. Bu məbləğin kiçik bir hissəsi A Seriyasının xəzinəsinə köçürüləcək. Superkubokun sahibi 7 milyon avro qazanacaq, mükafatın qalan hissəsi isə iştirakçılar arasında bölünəcək.
* Ötən yay Səudiyyə Ərəbistanının Superkubokun daha 5 mövsümünü (2023/24 – 2027/28) təşkil etmək hüququ qazanması haqda xəbər yayılmışdı. Amma müqavilənin bəzi bəndləri sonradan dəyişdirilib: Asiya ölkəsi 6 növbəti turnirdən 4-ünə evsahibliyi edəcək. İlk iki yarış krallıqda, növbəti iki mövsüm İtaliyada və sonrakı iki turnir yenidən Asiyada təşkil olunacaq.

Daha çox qazanc
“Reuters” agentliyinin jurnalisti Daniele Mari yayda A seriyasında yarışan klubların 2021/22 mövsümü üçün qazancı ilə bağlı material hazırlamışdı. Bura teleyayın hüquqlarının satışından əldə olunan vəsait də daxil idi. Ölkə kubokunun yarımfinalçılarının qazancına nəzər salsaq, “İnter” 84,2, “Yuventus” 77,9, “Fiorentina” isə 51,2 milyon avro irəli düşüb. “Kremoneze” bu siyahıda təbii səbəbdən göstərilməyib. Çünki bu komanda A seriyasının ötən mövsümündə iştirak etməyib.

“Yuventus” və ya “İnter”dən danışsaq, Superkubokun qalibi faktiki olaraq mövsümlük gəlirlərin 10 faizinə də sahib çıxır. Yeni format “Fiorentina” üçün də az əhəmiyyət daşımır. Florensiya klubu finala vəsiqə qazanmaqla azı 2 milyon, Superkubokda iştiraka görə isə təxminən 3-4 milyon avro qazana bilər. “Yuventus” və “İnter”in iddia etdiyi həmin 10 faizlik gəlirdən söhbət gedir.

Dal Pinonun qətiyyəti
İtaliya Superkuboku matçı ilk dəfə Səudiyyə Ərəbistanında 2019-cu ildə keçirilib. “Yuventus” yeganə oyunda “Milan”a Kriştiano Ronaldonun qolu ilə qalib gəlib. Bu hadisə 4 il əvvəl yanvar ayında baş verib. Bundan bir neçə ay əvvəl jurnalist Camal Haşoqqi qətlə yetirilmişdi.

Ərəblərlə əməkdaşlığa görə italiyalılara yönələn təzyiq heç bir nəticə verməmişdi. Onda A Seriyasına rəhbərlik edən Paolo Dal Pino müqaviləyə hörmət edilməli olduğunu bəyan etməklə yanaşı, liqanın Səudiyyə Ərəbistanı İdman Nazirliyi ilə insan hüquqları üzrə əməkdaşlıq edəcəyini də bildirmişdi. Həmin müqavilə qüvvədə qalmış, bir müddət sonra yeni saziş imzalanmışdı.