“Diqqətinizə çatdırım ki, mükafatlandırma mərasimi 2024-cü ilin yanvarında keçirilsə də, səsvermə 2022-ci ilin dekabrından 2023-cü ilin oktyabrınadək olan dövrü əhatə edib. Yəni bir növ 2022/23 mövsümünün ən yaxşısı müəyyənləşdi. Yəqin ki, Lionel Messinin Qətər mundialındakı performansı da ümumi nəticəyə təsir göstərib. Həm də əksəriyyət kimə səs veribsə, deməli, o da layiqdi. Düzdü, norveçli məhsuldar mövsüm keçirib, həm “Mançester Siti” ilə, həm də fərdi bir çox titullar qazanıb. Amma fikrimcə, Holannın ötən Çempionlar Liqasının yarımfinal və final qarşılaşmalarında sönük oyun göstərib qol vura bilməməsi, üstəlik Norveç millisinin AÇ-2024-dən kənarda qalması seçimə təsir göstərib.

Əvvəllər həmişə seçimim çoxları tərəfindən təqdir olunub, eybi yox, bu dəfə müzakirə doğursun. Axı jurnalistlərin yox, kapitanların Messiyə üstünlük verməsi yekun nəticədə həlledici olub. Argentinalı elə futbolçudu ki, demək olar, çıxdığı hər oyunun ən yaxşısı seçilməyi bacarır. 2023-cü ildə ABŞ-da ardıcıl 7 oyunda fərqlənməklə o qədər də güclü olmayan “İnter Mayami”yə Liqa kubokunu qazandırdı. Argentinanın DÇ-2026-nın seçmə mərhələsindəki liderliyi də məhz onun sayəsindədi. Unutmayaq ki, 2023-cü ildə həmçinin “Qızıl top” və “Dünyanın Ən Yaxşı İdmançısı” (Laureus) mükafatlarını da qazanıb”.