“France Football” ötən əsrin 90-cı illərindən başlayaraq mükafatla bağlı bir çox eksperiment və yeniliklərə əl atıb. Düzdü, namizədlərlə bağlı hamı ilə məsləhətləşsələr də, birbaşa səsverməyə FİFA reytinqində ilk “100-lük”də qərarlaşan ölkələrin nümayəndələri qatılır. Sorğunun nəticələrinə gəlincə, Messi 2022/23-cü illər mövsümü üçün “Qızıl top” mükafatına layiq idi. Şübhəsiz, onun 2022-ci ilin dekabrında Argentinaya 36 illik fasilədən sonra dünya çempionluğunu qazandırması – bəli, məhz qazandırması - “dünyanın ən yaxşısı” seçilməsində mühüm rol oynadı. Qətər mundialında həm turnirin ən yaxşı oyunçusu, həm də 7 qol və 3 məhsuldar ötürmə ilə “Gümüş buts”un sahibi olub. Özü də qrup mərhələsindən sonra hər oyunda rəqib qapılarından top keçirib, Fransa ilə finalda da 2 qol vurub, həm də penalti seriyasında fərqlənib. Ondan sonra ABŞ-da ardıcıl 7 oyunda fərqlənməklə o qədər də güclü olmayan “İnter Mayami”yə Liqa kubokunu qazandırması da yaddan çıxmayıb.

Düzdü, “Qızıl top” uğrunda mübarizədə Messinin əsas rəqibi - norveçli Erlinq Holann da məhsuldar mövsüm keçirib, həm “Mançester Siti” ilə, həm də fərdi bir çox titul qazanıb. Amma fikrimcə, onun ötən Çempionlar Liqasının yarımfinal və final qarşılaşmalarında sönük oyun göstərib qol vura bilməməsi, üstəlik Norveç millisinin AÇ-2024-dən kənarda qalması seçimdə həlledici oldu”.