İtaliya çempionatının yüksək liqasında komanda sayı azaldıla bilər. Artıq bu mövzuda danışıqlar prosesi başlayıb.

Bu barədə “La Gazzetta dello Sport” məlumat yayıb. Ölkənin ən çoxtirajlı idman nəşri A seriyasında çıxış edən klubların təmsilçiləri ilə bu liqanın prezidenti Lorentso Kazininin çempionatda çıxış edən komandaların sayının azaldılması ilə bağlı qeyri-rəsmi danışıqlara başladıqlarını xəbər verib. Ümumi fikir A seriyası iştirakçılarının sayının 20-dən 18-ə endirilməsidi. Bunun tərəfdarı olanlar əsasən liqanın aparıcı klublarıdı. Bilindiyi kimi, növbəti mövsümdən Çempionlar Liqası, Avropa Liqası və Konfrans Liqasında yeni format tətbiq olunacaq. Avrokuboklarda matçların sayının artması İtaliya klub futbolunda təqvimin daha da sıxlaşmasına səbəb olacaq. Bəzi klublar bu tədbirlərə görə müəyyən qədər qazanc itkisinə məruz qalmaqdan ehtiyat edirlər.

Qeyd edək ki, təklifin qəbul olunması üçün A seriyasında yarışan 14 klubun komanda sayının azaldılmasına səs verməsi tələb olunur.