Artıq Konfrans Liqasının (KL) finalında hansı komandaların qarşılaşacağı məlumdu.

"Football-plus.az" xəbər verir ki, yarımfinalın mayın 18-də keçirilən matçlarından sonra “Vest Hem” ilə “Fiorentina” sonuncu mərhələdə iştirakını təmin etdi.

Bu komandalar iyunun 7-də Çexiyanın paytaxtı Praqada keçiriləcək finalda turnirin tarixinə 2-ci mövsümün qalibi kimi düşməyə çalışacaqlar.

yarımfinal, ilk oyunlar
Alkmaar - Vest Hem 0:1 (ilk oyun – 1:2)
Fornals, 90+4.

Alkmaar (Niderland): Rayan, Suqavara, Hatsidiakos, Bekema, Kerkej (M.De Vit, 85), Klasi, Reynders, Meynans (D.De Vit, 70), Karlsson (Merdink, 85), Van Brederode (Ladho,78), Pavlidis.
Vest Hem (İngiltərə): Areola, Zuma, Kerer, Agerd, Kressuell, Souçek, Rays, Paketa, Benrahma (Fornals, 75), Bouen, Antonio (İnqz, 85).

Turnirin favoritlərindən sayılan “Vest Hem” “Alkmaar”la duellərdə statusunu doğrultdu. Amma niderlandlılara qarşı oyunlar londonlular üçün heç də asan keçmədi. Premyer-liqadakı yerini qorumağa qarışan Devid Moyesin komandası evdə əzmkar qələbə qazansa da, cavab görüşündə çətinliklə üzləşəcəyi aydın idi. 1/8 finalda “Latsio”nu mübarizədən kənarlaşdıran “Alkmaar” londonlulara bacardığı qədər müqavimət göstərdi. Əsas vaxta əlavə olunan 4-cü dəqiqədə Fornalsın vurduğu qol “çəkicdöyənlər”in finalda oynayacağına şübhə yeri qoymadı.

“Vest Hem” qitə kuboklarında 47 ildən sonra yenidən finala vəsiqə qazandı. Komanda sonuncu dəfə Kuboklar Kubokunun (KK) 1975/76 mövsümünün həlledici oyununda “Anderlext”ə uduzub (2:4). İngiltərə klubunun qitə arenasındakı qələbəsindən isə 58 il keçir. Paytaxt təmsilçisi KK-nın 1964/65 mövsümünün qalibi olub.

Bazel - Fiorentina 1:3, əlavə vaxtda (2:1)
Amduni, 55 - Qonsales, 35; 72. Barak, 120+9.

Bazel (İsveçrə): Hits, Lanq, Adams Nuhu, Pelmar, Kalafyori, Caka (Fray, 88), Burger (Males, 106), Diuf, Ndoye, Oqustyen (Zekiri, 81), Amduni.

Fiorentina (İtaliya): Terraçano, Dodo, İqor (Ranyeri, 55), Milenkoviç, Biraqi, Bonaventura (Barak, 106), Amrabat, Kastrovilli (Mandraqora, 120+2), Brekalo (İkone, 46), Qonsales, Kabral (Yoviç, 91).


Ötən həftə Florensiyada keçirilən matçda gözlənilməz nəticə qeydə alınmışdı. “Fiorentina” ilk hissənin ortalarında hesabı açsa da, qalan vaxtda statistik üstünlüyünü tabloda əks etdirə bilməmiş və son 23 dəqiqədə qapısından iki top buraxaraq finala vəsiqə qazanmaq şansını çətinə salmışdı.

Bununla belə, bukmeker kontorları Vinçentso İtalyanonun komandasının “Bazel”i İsveçrədə məğlub etmək şansını yüksək dəyərləndirmişdi. Finala vəsiqə üçün isə səfərdə iki topluq üstünlük qazanmaq tələb olunurdu.

Bu mövsüm rəqib meydanlarında daha yaxşı təsir bağışlayan “Fio” ənənəsini Bazeldə də davam etdirdi. Əsas vaxt italiyalıların 2:1 hesablı üstünlüyü ilə başa çatdığından 30 dəqiqəlik əlavə vaxt qaçılmaz oldu. Qeyd edək ki, tribunadakı qonaq azarkeşlərdən birinin halı pisləşdiyi üçün matçda 8 dəqiqəlik fasilə yarandı.

Həmin fanatın xərəkdə xəstəxanaya aparılmasından sonra bərpa olunan oyunda hamı penalti seriyasının həyəcanına hazırlaşdığı vaxt Barak 120+9-cu dəqiqədə vurduğu qolla komnadasını finala daşıdı.

“Fiorentina” avrokuboklarda 1990-cı ildən sonra ilk dəfə finalda oynayacaq. Xatırladaq ki, komanda 33 il əvvəl UEFA kubokunun həlledici mərhələsində “Yuventus”a iki oyunun nəticəsinə əsasən məğlub olub.

Bombardirlər: Kabral (Fiorentina), Amduni (Bazel) - 7, Antonio (Vest Hem), Yoviç (Fiorentina), Kuypers (Gent) - 6.