Miloş Teodosiç Avroliqanın dekabrın 21-22-də keçirilən 16-cı turunun ən dəyərli oyunçusu sayılıb.

“Football-plus.az” xəbər verir ki, “Srvena Zvezda”nın oyun qurucusu komandasının “Makkabi”yə 98:92 qalib gəldiyi oyunda 27 xal toplayıb, 14 məhsuldar ötürmə verib, 2 ribaund edib və 2 dəfə topu ələ keçirib. 36 yaşlı serb ulduz oyunda 12 atışdan 8-də xal qazanıb, 5 cərimə atışını da dəqiq yerinə yetirib.
Bu oyunla bağlı daha bir maraqlı xəbər var. Belə ki, “Makkabi”nin legionerləri Belqradda keçirilən oyundan sonra İsrailə qayıtmaqdan boyun qaçırıb.

Klubun əcnəbi oyunçuları rəhbərliklə görüşdə təhlükəsizlik mülahizələrini əsas gətirərək İsrailə uçmaq istəmədiklərini bildiriblər. “Makkabi”ni irəlidə Avroliqada “Jalgiris”lə səfər oyunu və iki çempionat oyunu gözləyir. Belə görünür ki, çempionatda yalnız israilli basketbolçular meydana çıxacaq.