Ölkə çempionatında 17-ci tur üçün qəribə təqvim vurulub.

Deməli, bu gün bir, sabah ik, dekabrın 16-da daha bir oyun keçiriləcək, turun qızıl balığı sayılan “Qarabağ” – “Neftçi” oyunu isə bazar ertəsinə salınıb. Halbuki dekabrın 17-də, yəni bazar günü Azərbaycan derbisi keçirmək üçün hər cür imkan var. Amma yox, “Qarabağ” bu gün Avropa Liqasının oyununa çıxırsa, bazar günü çempionatda oynaya bilməz. PFL-in belə qərarları həmişə mübahisə və narazılıq doğurur. Gizlətmək lazım deyil, həm başqa klubların təmsilçiləri, həm də Avropanın futbol qayda-qanunları ilə yaşamağımızı istəyən bütün futbolsevərlər PFL-in Ağdam klubuna münasibətdə üzgörənlik etdiyini, ikili standartlar əsasında çalışdığını düşünür. Təsadüfi deyil ki, 17-ci turun təqvimi açıqlanandan dərhal sonra sosial şəbəkələri yenə də oxşar xarakterli mesajlar bürüyüb. Adamlar “köhlən atlar”a başqalarıyla müqayisədə daha çox istirahət vaxtı verilməsini qınayırlar. Onlar Avropada olduğu kimi, beynəlxalq turnirdə iştirak edənlərə hansısa güzəşt olunmamasını istəyir. Əlbəttə, biz bu məsələ ilə bağlı PFL-ə müraciət edə, izahat istəyə bilərdik. Sadəcə, yeni nəsə eşidə biləcəyimizə inanmadıq. Yox, PFL-in fərqli izahatı, yozumu, ictimaiyyətin narazılığına “su səpəsi” dəlili varsa, buyursun, eşitməyə hazırıq!

MİRKAMAL KAZIMZADƏ