Ölkə çempionatının aşağı liqalarında da mübarizə maraq doğurur. Təəssüf ki, tribunalarda azarkeş sayı azdı. Həmin azlar arasında xanımlar da var. Fidan Mübariz məhz “Sheki City”yə görə futbola maraq göstərir.

- İlk dəfə stadionda doğma bölgənin komandasına dəstək oldun.
- Bəli, ilk dəfə stadiondan canlı futbol izləyirdim. Kaş daha əvvəldən gələydim... Oyunu izlədikcə bu idman növünə marağı olanları anlamağa başladım. Çünki çox həyəcanlıydı.

- İlk dəfə stadiondan canlı futbol tamaşasına şahidlik etsən də, narazı qaldığın məqamlar oldu. Bu da azarkeşlərin tribunalarda təmizlik və etik qaydalara riayət etməməsidi.
- Bəli, narazı qaldığım məqamlar oldu. Adamların jarqon sözlərdən istifadə etməsi, tum çırtlaması, siqaret çəkməsi məni narahat etdi. Hətta bəzi bəylər bildirdi ki, belə məqamlarsız futbolu maraqla izləmək olmur.

- Sən "100 nəfər şəkili axtarırıq" ianə kampaniyasına qoşulan ilk xanım oldun. Necə düşünürsən, Şəkidə xanımların futbola həvəsi artacaqmı?
- Məndən sonra bu ianə kampaniyasına bir xanımın da qoşulduğunu gördüm. Xoşbəxtəm ki, sayəmdə daha bir zərif cinsin nümayəndəsi komandaya dəstək verdi. Düşünürəm ki, mənim də gəlməyim təsir edəcək.

- Ümumiyyətlə, hazırda Şəkidə futbola maraq hansı səviyyədədi?
- Əslində Şəkidə futbola maraq yetərincə böyükdü. Sadəcə, "Sheki City"ə inam çox deyil. Şəhərdə bu idman növünə marağı olanların hamısı stadiona gəlib tribunaları doldura bilər. Necə ki “Azərbaycanda futbol yoxdu” deyənlər var, Şəkidə də bu ifadəni işlədənlərə rast gəlmək olar.

- Bu bölgədə futbola marağı artırmaq üçün nələr etmək lazımdı?
- Bu prosesə məktəblərdən başlamaq lazımdı. Təhsil idarəsi ilə danışaraq azyaşlı uşaqları stadionlara cəlb etmək olar. Mən xanım olaraq bir oyunla futbola aşiq oldumsa, uşaqlarda bu maraq daha çox olar.

- Hazırda "Sheki City" çempionatda 20 xalla 7-ci yerdədi.
- “Sheki City”nin heyətində güclü oyunçular var. “Kür-Araz”la oyunun qolsuz bitməsi göstərdi ki, komanda müdafiədə yaxşıdı. Çempionatı birinci yerdə bitirəcəklər demək dərəcəsində futboldan anlayışım və təcrübəm olmasa da, ilk sıralarda olacaqlarını düşünürəm.

- Bir çox futbol komandalarının xanım azarkeşləri sevimli klubları hansısa böyük uğur qazananda önəmli jest edir. Sən bu yöndə nə düşünürsən?
- İndi dəqiq nəsə deyə bilmərəm. Amma komandanın futbolçularına motivasiya vermək yaxşı olar. Məsələn, Şəkinin ən məşhur restoranlarının birində futbolçular üçün öz hesabıma şam yeməyi təşkil edərəm.

- Başqa hansısa idman növünə marağın var?
- Uşaqlıqdan voleybola maraq göstərmişəm. Boş vaxtlarımda bu idman növü ilə məşğul oluram. Son vaxtlar həvəskar şəkildə üzgüçülüyə də başlamışam.

- Bəs niyə voleybolçu olmadın?
- Şəkidə belə şərait yox idi. Həmçinin də ailəm təhsil almağımı istədi. Buna görə də bu barədə düşünmədim.

CAVİD ƏLİYEV