Sərlövhə sizi çaşdırmasın. Bəli, Lionel Messi “Barselona”nı çoxdan – 2021-ci ilin yayında tərk edərək PSJ-yə keçib. Amma hazırda “İnter Mayami”də çıxış edən ulduz futbolçu doğma klubu ilə vida matçı keçirməyib.

Artıq bu planda boşluğun aradan qalxacağına rəsmən aydınlıq gəlib. 36 yaşlı hücumçu 2024-cü ildə “Nou Kamp”da vida matçına çıxacaq. “Football Transfers”in yaydığı xəbərə görə, gələn il noyabrın 29-da keçiriləcək matç həm də klubun 125 illiyi şərəfinə təşkil ediəcək. Messi “Barselona”nın Əfsanələri” komandasının heyətində dünya yığmasına qarşı oynayacaq.

Onun komandasında Ronaldinyo, Romario, David Vilya, Rivaldo, Fransesk Fabreqas, Luis Enrike kimi məşhur sabiq futbolçular çıxış edəcək. Rəqib komandada isə Kriştiano Ronaldo, Zinəddin Zidan, Serxio Ramos, Qaret Beyl kimi sabiq “Real”lılar oynayacaq.